Búgin Abaı qalasynda shahtada metannyń taralýynan qaza tapqan kenshilermen qoshtasý rásimi ótti. Onyń ishindegi eń jasy - 31 jasta, eń úlkeni - 53-te edi.
«Bul - bárimiz úshin orny tolmas qaıǵy. Biz búgin baýyrlarymyz ben uldarymyzdy jerlep jatyrmyz. Men 71 jastamyn, biraq ókinishke qaraı, jas jigittermen qoshtasýǵa kelip turmyn. Bizdiń jumysymyz óte qaýipti. Mundaı qaıǵyly jaǵdaıdyń aldyn alý múmkin emes. Shahtada jumys isteıtinderdiń bári bizdiń jumysymyz asa qaýipti ekenin biledi», deıdi ardager shahtıor Vıktor Kazakov.
«ArselorMıttal Temirtaý» bas dırektory qaza tapqandar men zardap shekkenderdiń otbasylary kompanııadan tolyq moraldyq jáne materıaldyq qoldaý alatynyna sendirdi.
«Biz otbasylarǵa kómek kórsetý úshin ár úıelmenge jaýapty tulǵalardy taǵaıyndadyq. Biz sondaı-aq zardap shekkenderge qamqorlyq jasaımyz. Olarǵa medısınalyq jáne basqa da kómek kórsetemiz. Komıssııa jumys isteıdi. Bolǵan oqıǵany tergeý barysynda komıssııaǵa jan-jaqty qoldaý kórsetemiz. Memlekettik komıssııanyń tergeýi aıaqtalǵanǵa deıin bizge ishki tergeý júrgizýge ruqsat joq», dedi «ArselorMıttal Temirtaý» AQ Bas dırektory Bıdjý Naır.
Sondaı-aq kompanııa basshylyǵy qaza tapqandardyń balalary men otbasylaryna oqý aqysyn tóleý jáne nesıelerin óteý boıynsha kómek kórsetýge mindetteledi.
«Oqýǵa qatysty bizde 20 jasqa deıin ýnıversıtette oqýǵa qarajat berý týraly mindetteme bar. Másele qazir talqylanyp jatyr. Ár otbasyna jerleý, qonaq asyn uıymdastyrý sııaqty barlyq mindettermen aınalysatyn maman taǵaıyndalady. Kompanııa olardyń nesıesin óteýdi óz moınyna alady. Kompanııa qaza tapqandardyń otbasyna on jyldyq jalaqy tóleý boıynsha mindetteme aldy», dedi «ArselorMıttal Temirtaý» AQ atqarýshy dırektory Álisher Ábenov.
Eske salaıyq, 7 qarasha kúni saǵat 08:24-te «ArselorMıttal Temirtaý» AQ Kómir departamentiniń «Abaı» shahtasynda metan gazy taraı bastaǵan. Bul ýaqytta shahtada 64 adam jumys istep jatqan, 54-i evakýasııalandy.
Apat saldarynan eki adam zardap shegip, alty kenshi qaza tapty. Zardap shekkender aýyr halde jansaqtaý bóliminde jatyr.
Prezıdent Qasym-Jomart Toqaev qaza tapqan shahterlerdiń jaqyndary men týystaryna kóńil aıtty.
Sondaı-aq zardap shekken azamattardyń tezirek saýyǵyp ketýine tilektestik bildirdi. Apat saldarynan qaza bolǵandar men zardap shekkenderdiń esimi jarııalandy.
QR TJM basshysy Iýrıı Ilın BAQ ókilderine arnalǵan brıfıngte apatqa qatysty qylmystyq is qozǵalǵanyn aıtty.
Kóz jumǵan 6 kenshi metan gazy taraǵan kezde qutqarý quralyn kıip úlgermeı qalǵan.
