«Saǵat 08.10 shamasynda Mercedes avtokóliginiń 42 jastaǵy júrgizýshisi Buhar jyraý kóshesinen Túrkistan kóshesi arqyly Orynbor kóshesine qaraı júrip kele jatyp, tizginge ıe bola almaı, aldynda turǵan alty kólikpen soqtyǵysýyna sebepker bolǵan. Sonyń saldarynan Mercedes avtokóliginiń ekpininen jol boıynda turǵan KIA Cerato avtokóligi jol jıegine shyǵyp ketken», delingen polısııa departamentiniń baspaóz qyzmeti taratqan aqparatta.
Apat saldarynan birneshe adam zardap shekken.
«Tórt júrgizýshi men bir jolaýshy jaraqat alyp, medısınalyq kómek kórsetý úshin aýrýhanaǵa jetkizildi. Atalǵan fakti boıynsha anyqtaý jumystary júrip jatyr. Polısııa departamenti júrgizýshilerdi qozǵalys kezinde barynsha muqııat bolýǵa, jyldamdyq rejımin, qaýipsiz qashyqtyqty jáne manevr jasaý erejelerin múltiksiz saqtaý kerektigin eskertedi», dedi departament ókilderi.
