Asqar Mamın men Anna Berde Dúnıejúzilik Bank pen QR Úkimetiniń kómirtekti beıtaraptyq maqsattaryna qol jetkizý úshin ekonomıkanyń bazalyq salalaryn jańǵyrtýǵa ınvestısııalar tartý máseleleri boıynsha pikirsaıys sessııasyna qatysty.
«Qazaqstannyń Dúnıejúzilik bankpen yntymaqtastyǵynyń úsh onjyldyǵy ishinde qarjy, ınfraqurylym, TKSh, energetıka, shaǵyn jáne orta bıznes, AО́K jáne IT-sektor sııaqty salalarda jalpy somasy $8 mlrd astam bolatyn 55-ten asa joba iske asyryldy. Dúnıejúzilik Banktiń Qazaqstandaǵy aǵymdaǵy ınvestısııalyq portfelinen qazirgi kezde jalpy somasy $3,6 mlrd quraıtyn 13 joba iske asyrylýda», dedi A. Mamın.
Úkimet basshysy Qazaqstanda «jasyl» ekonomıka modelin engizý jáne turaqty ósýdi qamtamasyz etý boıynsha Dúnıejúzilik Bankpen yntymaqtastyqty odan ári keńeıtýdiń mańyzdylyǵyn atap ótti.
Dúnıejúzilik Bank toby damýshy elderdegi klımattyń ózgerýine qarsy kúres jónindegi sharalardy qarjylandyratyn álemdegi eń iri kópjaqty uıym. Kezdesýge qatysýshylar «jasyl» ınvestısııalardy tartýǵa jáne energetıka, aýyl sharýashylyǵy, óńdeý ónerkásibi, AKT, ınjınırıngtik qyzmetter, kólik jáne t.b. salalarda ósýdiń jańa kózderin qalyptastyrýǵa yqpal etetin modelder men faktorlardy qarastyrdy.
Shyǵaryndylar deńgeıi tómen ınfraqurylym men tehnologııalardy damytýdaǵy memlekettik jáne jekemenshik sektorlardyń halyqaralyq tájirıbesi talqylandy.
Pikirtalas sessııasyna QR Úkimetiniń músheleri, sondaı-aq jasyl ósimdi yntalandyrý salasyndaǵy jetekshi sarapshylar – DB ınfraqurylym jónindegi óńirlik dırektory Charlz Korme, EYDU Eýrazııa bóliminiń basshysy Ýılıam Tompson, Rım ýnıversıtetiniń professory Paskýale Lýchıo Skandısso, Grekııa Qorshaǵan orta jáne energetıka mınıstrligi janyndaǵy «Ádil aýysýdy damytý jospary» quqyqtyq máseleleri jónindegi Sarapshylar komıtetiniń prezıdenti Gresıı Ioannıs Sorsıs, Jańa Zelandııadaǵy Eńbek ónimdiligi máseleleri jónindegi komıssııanyń basshysy Endrıý Svıt, Fınlıandııa qarjy mınıstriniń aǵa keńesshisi, Klımattyń ózgerýine qarsy kúres jónindegi qarjy mınıstrleri koalısııasynyń teń tóraǵasy Pekka Moren, isker toptar ókilderi jáne t. b. qatysty.
