Marapattaý saltanaty ádettegideı qyzyl kilem ústinen ótý rásimimen bastaldy. Bul sharaǵa Qazaqstannyń halyq artısi Asanali Áshimov, «Qazaqfılm» kınostýdııasynyń prezıdenti Aqan Sataev, kınostýdııanyń óndiris boıynsha vıse-prezıdenti Aıdar Batalov, «Ulttyq kınony qoldaý memlekettik ortalyǵy» KEQ Bas prodıýseri Adaı Ábildınov, Qazaqstannyń eńbek sińirgen qaıratkeri Rýstem Ábdirashev, akter Berik Aıtjanov, akter Erkebulan Daıyrov aktrısalar Almıra Tursyn jáne Madına Esmanova, rejısser Nurǵısa Álmurat, prodıýser Nurlan Qoıanbaev jáne basqalary qatysty. Festıvaldiń jabylý saltanatyna QR Mádenıet jáne sport mınıstri Aqtoty Raıymqulova da qatysty.
Festıval sheńberinde Qazaqstan, Ázirbaıjan, Túrkııa, О́zbekstan jáne Qyrǵyzstan mınıstrleri joǵaryda atalǵan memleketterde «Qoqyt ata» festıvalin ótkizý, sondaı-aq kıno óneri salasynda yntymaqtastyq jóninde memorandýmǵa qol qoıdy.
Túrkııada alǵash ret ótkizilip otyrǵan Korkut Ata Turkic World Film Festival kınofestıvalinde bıyl 13 elden barlyǵy 42 kınotýyndy qatysty.
Festıvaldiń ashylý saltanatynda rejısser Aqan Sataevtyń «Tomırıs» fılmi kórsetildi.
