Kınofestıval Túrki áleminiń mádenı qundylyqtaryn júzege asyratyn kıno týyndylarymen tanystyrý, túrki tildes elder arasyndaǵy yntymaqtastyqtyń mádenı jáne kórkemdik múmkindikterin nyǵaıtý, sondaı-aq ortaq tarıhı, mádenı jáne qoǵamdyq qundylyqtardy kıno óneri arqyly damytýǵa úles qosý maqsatynda ótkizildi.
Kınofesıvalǵa qatysýshy elder arasynda Túrki mádenıetin, tarıhyn jáne salt-dástúrin beıneleıtin qundylyqtardy álemde ilgeriletýde mańyzdy ról atqaratyn jobalardy iske asyrý úshin «Túrki áleminiń fılmder qoryn» qurýǵa ýaǵdalasty.
Osy deklarasııaǵa sáıkes taraptar túrki áleminiń óneri men mádenıeti salasyndaǵy yntymaqtastyq úshin múmkindikterdi arttyrý maqsatynda Korkut Ata Turkic World Film Festival kınofestıvalin iske asyrýǵa yqpal etetin bolady.
Kınematografııa salasyndaǵy birlesken deklarasııaǵa QR Mádenıet jáne sport mınıstri Aqtoty Raıymqulova, Ázirbaıjan Respýblıkasynyń Mádenıet mınıstri Anar Kárimov, Qyrǵyzstan Respýblıkasynyń Mádenıet, aqparat, sport jáne jastar saıasaty mınıstri Azamat Jamanqulov, Túrkııanyń mádenıet jáne týrızm mınıstri Mehmet Ersoı, О́zbekkıno Ulttyq agenttiginiń bas dırektory Fırdavs Abdýhalıkov qol qoıdy.
Festıvalge Qazaqstan, Ázirbaıjan, О́zbekstan, Qyrǵyzstan, Saha jáne Gagaýzııa elderinen 100-den astam halyqaralyq prodıýserler, rejısserler men akterler, sondaı-aq elimizden KSRO halyq artısi Asanáli Áshimov, «Qazaqfılm» kınostýdııasynyń prezıdenti Aqan Sataev, kınostýdııanyń óndiris boıynsha vıse-prezıdenti Aıdar Batalov, «Ulttyq kınony qoldaý memlekettik ortalyǵy» KEQ Bas prodıýseri Adaı Ábildınov, Qazaqstannyń eńbek sińirgen qaıratkeri, rejısser Rústem Ábdirashev, Qazaqstannyń eńbek sińirgen qaıratkeri, akter Berik Aıtjanov, aktrısa Almıra Tursyn jáne Madına Esmanova, rejısser Nurǵısa Álmurat, prodıýser Nurlan Qoıanbaev syndy taǵy da basqa kıno maıtalmandary qatysty.
Aıta keteıik, atalǵan festıval sheńberinde Aqan Sataevtyń «Tomırıs» fılmi, Rústem Ábdirashevtyń «Qazaq handyǵy. Altyn taq» kórkem fılmi, Satybaldy Narymbetovtyń «Amanat» fılmi, rejısser Baqyt Qaıyrbekovtyń «Qutyda janǵan alaý» fılmi, Adaı Ábeldınovtyń «Kúltegin» tarıhı tolyqmetrajdy anımasııalyq fılmi kórsetildi. Sonymen qatar kınofestıval barysynda qazylar alqasynyń nazaryna tolyq metrajdy 8 fılm jáne derekti janrdaǵy 9 fılm usynyldy. Festıval aıasynda konkýrstan tys 25 fılm kórsetildi.
Is-shara barysynda sóz alǵan Aqtoty Raıymqulova Túrki elderiniń basyn qosyp, Korkut Ata Turkic World Film Festival kınofestıvalin uıymdastyrǵan Túrkııa Respýblıkasynyń basshylyǵyna jáne Mádenıet jáne týrızm mınıstrine, uıymdastyrýǵa atsalysqan barsha azamattarǵa qazaq eliniń jáne kıno maıtalmandarynyń atynan úlken alǵysyn jetkizdi.
«Qazaq pen Túrik halyqtarynyń tarıhı tamyrlastyǵy ǵasyrlar qoınaýynan bastaý alady, tilimiz ben mádenıetimiz jaqyn, qundylyqtarymyz ben dúnıetanymymyz ortaq. Tarıhtyń tereń qoınaýynan bastaý alyp búgingi kúnge deıin jalǵasyp kele jatqan máńgilik baýyrlastyq baılanystardyń osyndaı jarqyn úlgisi bizdiń elderimizdiń arasyndaǵy yntymaqtastyqtyń jan-jaqty damýyna, mádenı baılanystardy odan ári nyǵaıtýǵa sergek serpin beretini kúmánsiz.
Bizdiń elimizde Qazaqstan men Túrkııanyń kıno óneri salasyndaǵy baılanystar Elbasymyz N. Nazarbaevtyń qoldaýymen 1993 jyldan beri damyp kele jatyr. Dálirek aıtsaq, sol jyl túrik rejısseri M.Álı О́zpolattyń Ordabasydaǵy quryltaıǵa jáne sol kezde túsirilip jatqan «Qoja Ahmet Iаsaýı» fılmin «Arman» kınostýdııasymen birigip shyǵarýǵa shaqyrylǵan kezde bastalǵan bolatyn. Odan keıin de eki el arasynda Memleket basshylarynyń qoldaýymen ár jyldary túrli halyqaralyq kınofestıvalder men kınoaptalyqtary únemi ótkizilip keledi.
О́tip jatqan «Qorqyt ata» halyqaralyq kınofestıvalinde Qazaqstan tarapynan usynylyp jatqan kınotýyndylar men delegasııa ókilderiniń joǵary dárejede kelip qatysýy Prezıdentimiz Qasym-Jomart Kemeluly Toqaev myrzanyń osy sala ókilderine úlken qoldaýy dep bilemiz», dedi Mádenıet jáne sport mınıstri.
