Taraptar kezdesýde Qazaqstan men EKPA arasyndaǵy yntymaqtastyqty arttyrý, bizdiń elimizdegi saıası reformalardy zańnamalyq turǵydan qamtamasyz etý jáne adam quqyqtaryn iske asyrý máselelerin talqylady.
Senat Tóraǵasy óz sózinde Qazaqstanǵa EKPA-men yntymaqtastyq asa mańyzdy ekenin atap ótti.
«Bir top depýtattardyń EKPA-nyń kúzgi sessııasynda «Qazaqstandaǵy saıası reforma onyń azamattarynyń qajettilikteri men maqsat-nıetine jaýap beredi» degen deklarasııasyn qabyldaýyn asa mańyzdy oqıǵa dep esepteımiz. EKPA depýtattary Qazaqstanǵa turaqty túrde kelip turady, saılaýdy baqylaý jónindegi mıssııalar men basqa da sharalarǵa qatysady. Pandemııaǵa baılanysty qalyptasqan jaǵdaı turaqtala bastaǵaly osyndaı baılanystardyń oflaın túrinde ótip jatqanyn qýantady. Eýropalyq áriptesterimizben syndarly dıalogty aldaǵy ýaqytta odan ári damytýǵa múddelimiz», dedi Máýlen Áshimbaev.
Júzdesýshiler bizdiń elimizdegi saıası júıeni odan ári demokratııalandyrý máseleleri týraly pikir almasty. Máýlen Áshimbaev Memleket basshysy Qasym-Jomart Toqaevtyń elimizdi jańǵyrtý jónindegi kún tártibi jáne sonyń aıasynda júzege asyp jatqan saıası reformalar týraly aıtty. Senat Tóraǵasy Qazaqstan Parlamenti el Prezıdentiniń saıası bastamalaryn zańnamalyq turǵyda qamtamasyz etý jolynda aýqymdy jumys atqaryp otyrǵanyn atap ótti.
«Memleket basshysynyń bastamasymen júrgizilip jatqan saıası reformalar strategııalyq sıpatqa ıe. Atalǵan bastamalar saıası júıeni odan ári demokratııalandyrýǵa, onyń ashyqtyǵyn qamtamasyz etýge, saıası básekelestikti arttyrýǵa, azamattardyń quqyqtaryn iske asyrýǵa qajetti jaǵdaılar jasaýǵa arnalǵan», dedi Máýlen Áshimbaev.
Senat Tóraǵasy áńgime barysynda Qazaqstan Parlamenti EKPA-men túrli baǵyttar boıynsha yntymaqtastyq ornatýǵa daıyn ekenin aıtty.
«Bizdiń elimiz Eýropa Keńesiniń birqatar halyqaralyq bastamalaryn, sondaı-aq, qazirgi zamanǵy memleketterdiń turaqtylyǵy, órkendeýi, qaýipsizdigi men ekonomıkalyq damýy úshin qajetti negizgi sharttar sanalatyn ámbebap qundylyqtardy – demokratııany, adam quqyqtaryn jáne zań ústemdigin qoldaıdy», dedi Máýlen Áshimbaev.
Senat Tóraǵasy sóziniń sońynda Qazaqstan saıası reformalardyń kún tártibin qarqyndy ilgeriletýge, azamattardyń quqyqtaryn qorǵaý jóninde sharalar qabyldaýǵa nıetti ekenin atap ótti. Parlament Senatynyń depýtattary osy jumystarǵa belsendi túrde atsalysa beredi.
