Jambyl oblysyndaǵy daýyl saldarynan 50-ge jýyq azamat medısınalyq kómek alýǵa májbúr bolǵan.
38 metr/sekýnd jyldamdyqpen soqqan jel saldarynan tek shatyrlar ushyp qana qoımaı, birneshe ǵımarattyń qorshaýy búlingen.
Qala ákimdigi taratqan málimetterge zer salsaq, jıyrmaǵa jýyq elektr baǵanasy jer qushyp, 1,5 shaqyrymdyq elektr jelilerine zaqym kelgen. Daýyldyń kesirinen jylý berý ýaqytsha toqtaǵan. Shahar kóshelerinde kóptegen taldar, 12 aıaldama qulap qalǵan.
Odan bólek, 32 baǵdarsham isten shyǵyp, 34 bılbord, 64 jalaýsha jyrtylǵan. Pılondardyń 2 dana konstrýksııasy men 4 bılbordtyq konstrýksııalar qulaǵan.
Qyzyl-Abad, Kóltoǵan turǵynjaı alqaptarynda, Jeltoqsan-Qonaev kósheleriniń qıylysynda, Áıteke bı kóshesi №11 úıdiń mańyndaǵy 6 sport alańshalarynyń qorshaýlaryna zaqym kelgen. Bilim alýshylar úılerine jiberilip, onlaın oqý júıesi qosylǵan.
Shaharda qulaǵan aǵashtardy kesý jáne tazalaý jumystaryna «Jasyl El-Taraz» JShS-niń qyzmetkerleri, 6 brıgada tartylyp, tıisti jumystar atqarylyp jatyr. Elektr júıelerin qalpyna keltirý jumystaryna jaýapty mekemeler jumyldyrylǵan.
Jaýapty mekemeler kúsheıtilgen rejımde iske kirisken. Aldaǵy táýlikte jelden kelgen zardap saldary tolyq joıylmaq.
