Ázerbaıjan Respýblıkasy Mıllı Mejlısi tóraǵasynyń orynbasary Adıl Álıevpen júzdesýde parlamentaralyq yntymaqtastyqty nyǵaıtý máseleleri áńgime ózegine aınalyp, baýyrlas elder týystyǵynyń ortaq ustanymdary jan-jaqty talqylandy.
Odan ári Májilis Tóraǵasy Nurlan Nyǵmatýlın Túrkııa Respýblıkasy Uly Ulttyq Jınalysy Tóraǵasynyń orynbasary Sıýreııa Bılgıchpen kezdesti. Onda Palata Spıkeri bizdiń elderimizdiń basshylyǵynyń arasyndaǵy ózara túsinistik pen dostyq negizindegi birlesken jumystardyń nátıjesinde Qazaqstan jáne Túrkııa úlken tabystarǵa qol jetkizgenin atap ótti. Sonymen qatar, túrki tildes memleketteriniń basshylarynyń qatysýymen Sammıt ótkenin, basqosý Túrki Álemi úshin mańyzy zor sát bolyp, Sammıt qorytyndysy boıynsha uıym ataýyn «Túrki memleketteriniń uıymy» dep ózgertý týraly tarıhı sheshim qabyldanǵanyna nazar aýdardy.
Nurlan Nyǵmatýlınniń aıtýynsha, bul baýyrlas memleketter arasyndaǵy baılanystardy odan ári tereńdetip, Túrki Áleminiń birligin nyǵaıtýǵa baǵyttalǵan jumystardy Túrki elder Parlamenttik Assambleıasy aıasynda odan ári belsendi jalǵastyratyn bolady.
Odan bólek, О́zbekstan Olıı Majlısi Zań shyǵarý palatasy Tóraǵasynyń orynbasary Odıljon Tojıevpen, Reseı Federaldyq Jınalysy Memlekettik Dýmasynyń komıtet tóraǵasy Leonıd Kalashnıkovpen kezdesýde elderimiz parlamentshileriniń turaqty kezdesýleri zańnamalyq tájirıbe almasýǵa serpin bere otyryp, halyqtarymyzdyń ıgiligi jolynda tıimdi is-qımyl jasaýǵa jol ashatynyna senim bildirdi.
