Úsh tún boıy Nıderlandyda koronavırýstyq shekteý sharalaryna qarsy narazylyqtar tolastaǵan joq. Turǵyndardyń belsendiligi dúısenbiniń tańyna deıin jalǵasyp jatty. Polısııa qyzmetkerleri vandalızm, órteý jáne otshashý uıymdastyrǵany úshin búkil el boıynsha 30-ǵa jýyq adamdy ustady. Birqatar qalalarda tótenshe jaǵdaı rejımi engizildi.
Rozendalda buzaqylar bastaýysh mektepti órtep jiberdi. Sondaı-aq otshashýlar uıymdastyryp, nátıjesinde avtomobıl órtendi. Qoǵamdyq tártipti buzǵany úshin quqyq qorǵaý organdary 15 azamatty quryqtady.
Tótenshe jaǵdaı rejımi 20:30-dan 7:00-ge deıin engizilgen Enshedte polısııa vandalızm jáne otshashý uıymdastyrǵany úshin bes turǵyndy jazaǵa tartpaq.
Gronıngen qalasynda aksııa aldymen beıbit túrde ótti. Biraq sodan keıin birqatar oqıǵalar tirkeldi. Sonymen narazylyq aksııasynyń qatysýshylary dúkenge basyp kirip, sol jerden velosıpedter alyp, aıaldamaǵa zaqym keltirdi. Tılbýrgte jınalǵan ondaǵan adam birneshe qoqys jáshigin zaqymdap, otshashý uıymdastyrdy.
Senbi kúni tártipsizdikter birden birneshe qalada boldy. Narazylyq aksııasyna qatysýshylar tártip saqshylary tarapyna qaraı otshashýlar jasap, kóshelerdiń ortasynda ot jaqty. Polısııa búkil el boıynsha 28 adamdy ustady.
Odan buryn Rotterdamdaǵy shekteý sharalaryna qarsy narazylyqtarda tártipsizdikter oryn alyp, polısııamen qaqtyǵystar boldy. Tártipsizdikti uıymdastyrýshylardyń kóshbasshysy tártip saqshylaryna tas laqtyrdy. Polısııa jınalǵandardy taratý úshin birneshe eskertý jasady. Birneshe adam jaraqat aldy, úsh turǵyn aýrýhanada jatyr dep habarlandy. Polısııa 50-den astam belsendini ustady.
О́tken aptada Nıderlandy premer-Mınıstriniń mindetin atqarýshy Mark Rıýtte el bıligi koronavırýstyń taralýyna qarsy birqatar shekteý sharalaryn engizý týraly sheshim qabyldaǵanyn, ol 4 jeltoqsanǵa deıin áreket etetinin aıtqan bolatyn.
Elde qajetti taýarlardy satatyn dúkender men sýpermarketter, dárihanalar, meıramhanalar, kafeler men barlar endi 20.00-de jabylady. Qalǵan dúkender, shashtarazdar men sulýlyq salondary 18.00-ge deıin jumys isteıdi. Sporttyq is-sharalar kórermendersiz ótkiziledi. Sonymen qatar, 1,5 metrlik áleýmettik qashyqtyq erejesi, sondaı-aq múmkindiginshe úıden jumys isteý týraly usynys qaıtadan kúshine endi.
