Qazaqstan Respýblıkasynyń Prezıdenti N.Á.Nazarbaevtyń kásipkerlerdi qoldaý týraly Málimdemesi

Qymbatty qazaqstandyqtar! Qur­metti kásipkerler! 27 aqpanda men elimizdegi ká­sip­kerlik qyzmettiń damýyna qajetti jaǵdaılardy jaqsartý jó­nindegi túbegeıli sharalar týraly Jarlyqqa qol qoıdym. Men 2 sáýirden bastap, 2015 jyldyń 1 qańtaryna deıin shaǵyn jáne orta bıznes sýbektilerine tekseris júrgizýge moratorıı jarııalaımyn. Men qazaqstandyqtardyń bıznes júr­gizýine qajetti jaǵdaıdy ári qaraı jaqsarta túsý maqsatynda Úkimetke birqatar naqty sharalar qabyldaýdy júktedim. Baqylaý qyzmeti salasynda: Birinshiden, josparly tekseris táji­rı­besinen bas tartamyz. Memlekettik organdar meniń Ákim­shili­gimmen kelise otyryp, obektıvti, álemdik ta­laptarǵa saı tekseristerdi anyqtaý júıe­sin ázirleıdi. Bul júıe boıynsha, 2015 jyldyń 1 qań­ta­rynan bastap tek shynymen de zańdy buzý yqtımaldyǵy joǵary kásipkerler tekse­riletin bolady. Eger kásipker zańnyń barlyq talaptaryn oryndaıtyn bolsa, tekserýshi organdar oǵan múldem barmaýǵa tıis! Ekinshiden, tekseristi júrgizý formaty kásip­kerlerge qoıylatyn barlyq artyq talaptardy alyp tastaıtyndaı etip, túbegeıli qaıta qaralady. Nátıjesinde talaptardyń jalpy sany 30 paıyzdan artyq mólsherge azaıady. Ol úshin Úkimet barlyq tekseris júrgizý reg­la­mentterin qaıta qaraýy qajet. Úshinshiden, tekseristerge balama retinde úshinshi tulǵanyń aldynda erikti túrde saqtandyrýdy zań júzinde bekitý qajet. Tórtinshiden, 2015 jyldyń 1 qańtarynan bastap shaǵyn jáne orta kásipkerlik sýbek­tilerin joıý resimi ońaılatylady. Bul – eldegi barsha tekserýlerdiń úshten biri. Besinshiden, Bas prokýratýra Ulttyq ká­sip­kerler palatasyna bızneske qatysty tek­serister jónindegi aqparatty qoljetimdi etedi. Bul tekserýshi organdardyń jumysyn ashyq ete túsip, qoǵamdyq monıtorıng tıim­diligin qamtamasyz etedi. Ruqsatnama resimderi salasynda: Birinshiden, ruqsatnamalardy berýdi avtomattandyrý aıaqtalady. Olardyń keminde 140 túri elektrondy formatqa kóshedi. Ekinshiden, qurylys salasyndaǵy resim­der qys­qartylýy tıis. Bul baǵytta aıtarlyqtaı kedergiler bar. Men Úkimetke jer telimderin berý jáne olardy paıdalaný maqsatyn ózgertý re­sim­derin, sonymen qatar, qurylysqa ruq­sat berý jáne ınjenerlik júıelerge qosý resimderin 50 paıyzǵa azaıtý týraly tapsyrma berdim. 2015 jyldyń 1 qańtarynan bastap jer telimderin resimdeý merzimi 30 kúnnen aspaýy kerek. Instıtýttyq-zańnamalyq salada: Birinshiden, memlekettik organdardyń tıimsiz, qolaısyz jáne ózektiligin joǵaltqan aktileriniń kúshi joıylatyn bolady. Ortalyq jáne jergilikti atqarýshy organdardyń turǵyndarǵa qyzmet kórsetý jónindegi ishki resimderi de qaıta qaralady. Osy jyldyń 1 maýsymyna deıin Úkimet ulttyq kásipkerler palatasymen birlese otyryp, tıisti zańnamalarǵa tolyq revızııa jasaýy tıis. Ekinshiden, bızneske yńǵaıly bolýy úshin Kásipkerlik kodeksiniń jobasyna kásipkerlik qyzmetti memlekettik retteý jónindegi zańdardyń barlyq normalary shoǵyrlandyrylýy tıis. Úshinshiden, Ekonomıkalyq yn­ty­maq­tastyq jáne damý uıymy elderinde qa­byl­danǵan retteýshi yqpal qaǵıdaty zańdyq turǵyda bekitiledi. Tórtinshiden, Qazaqstanda jańadan Bız­nes-ombýdsmen ınstıtýty qu­ry­lady. Onyń basty mindeti – kásipkerlerdiń qu­qyǵyn qorǵaý. Men atap ótken sharalar zańnamalyq ózgeristerdi talap etedi. Úkimet: 2014 jyldyń 1 sáýirine deıin ruq­sat berý jáne habardar etý máse­le­­leri jónindegi zańnyń jobasyn; 2014 jyldyń 1 qyrkúıegine deıin ká­­sip­kerlik qyzmetke qajetti jaǵdaıdy túbegeıli jaqsartý jónindegi zańnyń jobasyn; 2015 jyldyń 1 qańtaryna deıin ózin ózi retteıtin uıymdardyń qyzmeti máseleleri jónindegi zańnyń jobasyn Parlamentke engizýi kerek. Qurmetti qazaqstandyqtar! Kásipkerlikti, ásirese, shaǵyn jáne or­ta bıznesti damytý – «Qazaqstan 2050» Stra­te­gııasynyń eń basty mindetteriniń biri. Meniń Jarlyǵymdy júzege asyrý Qazaqstanda kásipkerlik qyzmetti damytýǵa qajetti jaǵdaılardy túbegeıli jaqsartýdy qamtamasyz etedi. Bul – bıznes júrgizip otyrǵan árbir qa­zaqstandyqqa naqty kómek. Kásipkerlerdiń jumysyna qajetti jaǵ­daıdy udaıy jaqsartyp otyrý árqashan da memlekettiń basty nazarynda bolady. Bul – Qazaqstannyń álemdegi barynsha damyǵan 30 eldiń qataryna qosylýy jo­lyn­daǵy taǵy bir mańyzdy qadam. Osy shara jáne kásipkerlikti damytýǵa memleketten qarajat bólý ekonomıkamyzdyń ósýine, jumys oryndarynyń kóbeıýine, barsha qazaqstandyqtardyń ál-aýqatynyń artýy­na serpin beredi dep senemin. ----------------------------------------- Sýretti túsirgender S.BONDARENKO, B.OTARBAEV.