Jınalǵan jurttyń aıryqsha kóńilinen shyqqany «Qoshqar kóterý» saıysy boldy. Kúsh-qýattary tasyǵan myqtylar básekesinde qoshqardy ıyqqa salyp 101 márte kótergen Baýyrjan Ábdiqaıym jeńimpaz atansa, Evgenıı Kım ekinshi oryndy ıelendi. Úshinshi satyǵa Nurbolat Ertas jaıǵasty. Kir tasyn kótergen bilekti jigitter de kópshilikti tamsandyrdy. Zil batpan tasty 81 ret áýeletken Erkin Erimbetov bas báıgeni qanjyǵasyna baılasa, Aqjol Joldasbaev (80 ret) pen Ýrmatbek Ibragımov (60 ret) kúmis pen qola medaldy enshiledi.
Arqan tartý saıysynda Tóle bı meshitiniń komandasyna teń keler eshkim tabylmady. Fınalda olar Abaı meshitiniń serkelerin san soqtyrsa, ál-Muhamed meshitiniń jamaǵaty úshinshi satyǵa turaqtady. Dopty qaqpaǵa tebýde Jandos Turysbek mergendik tanytsa, quramynda Azamat Dúısenbaı, Bekzat Rıjanov jáne Saıat Muhametkárim óner kórsetken «Nur-Múbárak» komandasy petank saıysynda jeńiske jetti. Ulttyq oıyn – asyq atýda Raıs Jeńisuly jeńimpaz dep tanyldy. Al bilekti jigitterdiń básekesi – armrestlıngte Tóle bı meshitiniń namysyn qorǵaǵan Abzal Tileýbaevtyń tegeýrinine eshkim shydaı almady. Jarys aıaqtalǵan bette jeńimpaz jáne júldeger atanǵan jigitter baǵaly syılyqtarmen marapattaldy.
– Jamaǵat arasyndaǵy jarystarǵa kópshiliktiń yqylasy jyl sanap artyp keledi. Bıyl fýtbol, voleıbol jáne mereke kúnderine oraılastyrylǵan túrli spartakıadalar ótkizdik. Qatysýshylardyń da, kórermenderdiń de qarasy mol boldy. Atalǵan is-sharanyń negizgi maqsaty – meshit jamaǵaty arasynda dene shynyqtyrý men sportty jáne salamatty ómir saltyn nasıhattaý, sonymen qatar ıslamnyń dástúrli emes aǵymynyń jeteginde júrgen jandarǵa asyl dinniń oń jolyn kórsetý. Osyndaı sporttyq saıystar arqyly eldiń rýhy kóterilip, meshit jamaǵatynyń birligi nyǵaıa tússe degen tilek bar, – deıdi jarysty uıymdastyrýshy Álııa Shaıhan.
