Basqosýda sýdıalar korpýsyna kadrlardy irikteý jáne Eýropa men TMD elderiniń tájirıbesinde sot keńesteriniń qyzmetin jetildirýdiń ózekti máseleleri talqylandy. Mundaı is-sharany uıymdastyrý ıgi dástúrge aınalǵanyn aıtqan Qazaqstan Joǵary Sot keńesiniń tóraǵasy Denıs Shıpp forýmnyń Eýropa men Azııa sot keńesteriniń, halyqaralyq ınstıtýttardyń, memlekettik organdardyń ókilderi, sondaı-aq quqyqtaný jáne HR menedjment salasyndaǵy jetekshi sarapshylar úshin mańyzdy taqyryptar boıynsha pikir almasatyn tıimdi alań ekenin atap ótti. «2018 jyly ótken dóńgelek ústel kezinde biz sýdıalar irikteý júıesin jáne Joǵary Sot Keńesi jumysyn jańǵyrtý máselelerine toqtalsaq, 2019 jyly sot júıesindegi kadr saıasatynyń perspektıvaly baǵyttary talqylandy. Jahandyq indet jaǵdaılary ótken jyly uıymdastyrylǵan dóńgelek ústeldiń taqyrybyn anyqtap berdi. Sýdıalyqqa úmitkerlerdi irikteý, sýdıalardyń jumysyn baǵalaý jáne joǵarylatýdaǵy zamanaýı sıfrly jáne chart tehnologııalar da keńinen sóz boldy», dedi D.Shıpp.
Joǵary Sot keńesiniń mártebesine arnalǵan jıynda Eýropa keńesiniń Venesııa komıssııasynyń tóraǵasy Býkkıkıo Djannı sot júıesiniń qoǵam múddesin qorǵaýdaǵy Joǵary Sot keńesteriniń tıimdiligine keńinen toqtalsa, Eýropalyq sot keńesteri jelisiniń prezıdenti Donattı Fılıppo sot júıesiniń turaqtylyǵy men táýelsizdigin qamtamasyz etý máselelerin sóz etti.
Al Qazaqstan Joǵary sotynyń Tóraǵasy Jaqyp Asanov keńestiń basty mıssııasy sýdıalar korpýsyn jasaqtaý ekenine toqtala kele: «Eger sýdıa kadrlary bilikti, myqty bolmasa, bul júıedegi eshqandaı reforma nátıje bermeıdi. Sebebi sýdıa ózi sheshim qabyldap, ózi úkim shyǵarady. Sondyqtan da bizdiń salada kadr biliktiligi óte ózekti másele», dedi. Sýdıalardy irikteý, olardyń mansaptyq joǵarylaýyna qatysty birqatar zań qabyldanǵanyn aıtqan J.Asanov bul baǵyttaǵy úsh negizgi jańalyqty atap ótti. Iаǵnı osy zańdardyń arqasynda elimizde sýdıalardy irikteý tártibi ózgerdi, tájirıbeli sýdıalardyń ketýine tosqaýyl qoıylyp, qatardaǵy sýdıalardyń táýeldiligi joıyldy.
Is-shara sheńberinde sýdıalar korpýsyn qalyptastyrýdaǵy Qazaqstan Joǵary Sot keńesiniń róli, qalyptasý jáne damý perspektıvalary jan-jaqty sóz bolyp, halyqaralyq sarapshylar Fransııa, Belgııa, Italııa jáne Ispanııa elderi tájirıbelerin úlgi ete otyryp, sot keńesteriniń zamanaýı eýropalyq modelderin egjeı-tegjeı talqylady. Sonymen qatar basqosýda sýdıalardyń biliktilik alqalary, Reseıdiń sýdıalar qaýymdastyǵy júıesindegi sýdıalar korpýsyn qurý tájirıbesi qarastyryldy.
