Ulttyq ekonomıka mınıstrliginiń aqparaty boıynsha, qyzmetter men taýarlardy onlaın-platformalar arqyly satatyn barlyq sheteldik kompanııalar Qazaqstan bıýdjetine QQS tóleýge mindetti bolady.
QQS stavkasy satylǵan taýarlar men qyzmetter somasynan 12%-dy quraıdy. Vedomstvoda atap ótkendeı, bul qazaqstandyq tóleýshilerge áser etpeıdi.
«Tólem tártibi óte qarapaıym bolady. Kompanııalar salyq esebine turmaıdy. Ońaılatylǵan tártipte olar salyq organdaryna hat jiberedi jáne QQS tóleýge daıyn ekendigi týraly habarlaıdy», dedi UEM vıse-mınıstri Azamat Amrın.
Ákimshilendirý sheteldik ınternet-kompanııalar bólinisinde aýdarylǵan somalar týraly ekinshi deńgeıdegi bankterdiń derekteri negizinde júzege asyrylady.
Ol úshin sheteldik kompanııany tólem júıelerin qoldana otyryp tólem jáne/nemese aqsha aýdarymyn alýshy retinde anyqtaıtyn tańbalardyń erekshe jıyntyǵy bolyp tabylatyn Merchant ID nemese MID túsinigin ornatý usynylady.
Merchant ID bankter tıisti tólemder men aqsha aýdarymdaryn sáıkestendiretin sheteldik ınternet-kompanııalar usynatyn derektemelerdiń biri bolyp tabylady.
Ekonomıka mınıstrliginde atap ótkendeı, bul halyqaralyq tájirıbe. Máseleni qaraý kezinde Eýropa elderiniń de, jaqyn kórshiler - Reseı men Belarýstiń de halyqaralyq tájirıbesi zertteldi.
UEM boljamyna sáıkes, QQS salyǵy esebinen bıýdjetke túsetin túsimder jylyna 2 mlrd teńgeni quraıdy.
Eske sala ketsek, 25 qarashada Senat Salyq kodeksine ınternet arqyly satylǵan taýarlarǵa sandyq salyqty engizýdi kózdeıtin túzetýlerdi qabyldady.
