Elorda aýmaǵyn abattandyrý erejelerine sáıkes, kondomınıým obektisin basqarý organdary – PIK, MIB sanıtarlyq tazartýdy, onyń ishinde úıdiń perımetri boıynsha bes metr shekaradaǵy irgeles aýmaqtyń qaryn kúreýdi qamtamasyz etýi mindetti.
Elordada aýdan ákimderiniń apparatty qalanyń jergilikti polısııa qyzmetiniń tabıǵat qorǵaý polısııasy ókilderimen birlesip qardan tazalaý boıynsha monıtorıng júrgizýde. Júrgizilgen jumystardyń nátıjeleri boıynsha 52 qyzmet kórsetýshi uıymǵa qatysty 142 KPTÚ boıynsha sharalar qabyldandy – buzýshylyqtardy joıý jóninde nusqamalar berildi. Sondaı-aq, kóppáterli turǵyn úılerge qyzmet kórsetetin 360 uıymnyń basshylary tıisti eskertý aldy.
Qyzmet kórsetetin uıymdarǵa qatysty berilgen nusqamalar oryndalmaǵan jaǵdaıda «Ákimshilik quqyq buzýshylyq týraly» Qazaqstan Respýblıkasy Kodeksiniń 505-babyna sáıkes ákimshilik jazalaý sharalary qabyldanatyn bolady. Qardy ýaqytyly jınamaǵany úshin PIK pen MIB basshylaryna 87 510 teńgeden 291 700 teńgege deıin aıyppul salynady. Osyǵan uqsas buzýshylyqqa jol berilgen jaǵdaıda, aıyppul mólsheri 116 680 teńgeden 875 100 teńgege deıin ósýi múmkin.
Aıta ketsek, elordanyń kommýnaldyq qyzmetteri qysqy kezeńniń basynan bastap kúsheıtilgen rejımde, táýlik boıy jumys isteıdi.
