«Almaty oblysynda 14 pen 29 jas aralyǵyndaǵy 400 myńdaı jas turady. Olardyń árqaısynyń boıynda jastyq jalyn, jastyq jiger bar. Tuńǵysh Prezıdent kúni qarsańynda óz salalarynda belsendiligimen, aıtýly jetistikterimen erekshelengen jastardy marapattap otyrmyz. Mundaı beleske óńirde jastar saıasatynyń ońdy júrgizilýiniń nátıjesinde jetip otyrmyz. Máselen, oblystaǵy jastardyń volonterlik uıymdarynyń qatysýymen 5 myńdaı qaıyrymdylyq sharasy ótkizildi, 38 myńdaı adamǵa áleýmettik kómek kórsetildi, volonterlardyń qoldaýynyń arqasynda 92 otbasy jańa qonysqa ıe boldy. Bul mysaldar men sandardyń ózi-aq sóılep tur. Jetisýlyq jastar osyndaı belsendi ómir saltyn, jetistikter jolyn odan ári jalǵastyrady dep senemin», dedi oblys ákiminiń orynbasary Batyrjan Baıjumanov.
Munan soń jıyn marapattaý rásimimen jalǵasty. Kóshbasshy atanǵandar qatarynda Ilfat Abdýllın «Úzdik sportshy» dep tanyldy. Ol halyqaralyq dárejedegi sport sheberi, sadaq atýdan ulttyq quramanyń múshesi. Tokıo Olımpıadasyna qatysqan. Japonııada ótken Olımpıadada jeke birinshilikte 64 qatysýshynyń ishinen 9-shy orynǵa taban tiredi. Bul – Qazaqstannyń táýelsizdik jyldary tarıhyndaǵy úzdik nátıje. Aıtýly jetistikterimen daralanǵandar qatarynda «Úzdik stýdent» atanǵan Darııa Ilııas ta bar. Ol «Elbasy medali» jobasynyń qola medal ıegeri. Taldyqorǵan Agrotehnıkalyq kolledjinde oqıdy, elimizdiń Úzdik stýdentteri akademııasynyń múshesi. «Úzdik jas ádebıetshi» atanǵan Asyl Sultanǵazy – «Aq qaýyrsyn» ádebı baıqaýynyń laýreaty, «Tul dúnıe» óleńder jınaǵynyń avtory, respýblıkalyq, oblystyq ádebı baıqaýlardyń birneshe dúrkin jeńimpazy. Al jas kásipkerler arasynda Janat Tátibaev úzdik dep tanyldy. Ol Jastar jyly aıasynda 3 mln teńge kólemindegi granttyń ıegeri bolǵan, qazir qus fabrıkasyn ashýǵa daıyndyq júrgizip jatyr, «Balapan» baǵdarlamasymen ashylǵan «Iаslı» balabaqshanyń dırektory. «Úzdik jas oryndaýshy» nomınasııasynda «AMANAT musis» Halyqaralyq festıvaliniń laýreaty Dáýren Berikbolov qara úzip shyqty. Sonymen qatar ol qyrǵyz-qazaq festıvalinde 14 eldiń ónerpazdary arasynan II oryndy ıelengen, Qyrǵyzstandaǵy «Jyl tańdaýy - 2020» syılyǵynyń «Jyldyń jas, úzdik ártisi» nomınasııasyn jeńip alǵan. «Jetisý» telearnasynyń redaktory Kámshat Muhametjan «Úzdik jas jýrnalıst» atandy. Ol «Halyq alǵysy» tósbelgisiniń ıegeri, Túrkitildes jýrnalıster qory uıymdastyrǵan baıqaýda «Aqparat taratatyn úzdik tilshi» nomınasııasyn jeńip aldy. Sondaı-aq, úsh bala tárbıelep otyrǵan Nurpeıisovter otbasy eń úzdik jas otbasy retinde marapattaldy. Bul jas shańyraq - «Jas otaý» oblystyq baıqaýynyń jeńimpazy. Jalpy, osy kúni barlyǵy 20 jas kóshbasshy marapattalyp, olarǵa arnaıy dıplomdar, estelik syılyqtar men aqshalaı sertıfıkattar tabystaldy.
Jalpy Almaty oblysynda jastar arasyndaǵy jumyssyzdyq deńgeıin tómendetý, jumyspen qamtýǵa jaǵdaı jasaý, eńbek naryǵynda jastardyń básekege qabilettiligin arttyrýǵa laıyqty kóńil bólinip keledi. Máselen, bıyl 15 myńnan astam jas jumysqa ornalasqan, josparǵa sáıkes «Jastar praktıkasyna» 1648 túlek jiberilgen. Sol sııaqty «Dıplommen - aýylǵa» baǵdarlamasy boıynsha 974 jas mamanǵa 284,1 mln teńge kóleminde kóterme járdemaqy tólendi. Turǵyn úı alýǵa 568 mamanǵa jalpy somasy 2,5 mlrd teńge jeńildetilgen nesıe berildi.
