Kitaphana qorynda qundy kitaptar ishinen sırek kezdesetin, kolleksııalyq jáne kóne basylymdar – ataqty «Atlantıka kodeksiniń» Leonardo da Vınchı manýskrıptiniń kóshirmesi saqtaýly tur. Folıant áıgili ónertapqyshtyń aerodınamıka, qarý, mýzykalyq quraldar, matematıka, botanıka jáne basqa sekildi taqyryptarǵa salǵan syzbalary men jazbalarynan turady. XVI ǵasyrdyń aıaǵynda músinshi Pompeo Leonı qurastyrǵan «Atlantıka kodeksiniń» túpnusqasy qazirgi kezde Mılandaǵy Ambrozıan kitaphanasynda saqtaýly. 2009 jyly qyrkúıekte Leonardo da Vınchıdiń syzbalary men qoljazbalarynyń jınaǵy álem jurtshylyǵyna tanystyrylyp, 2014 jyly manýskrıpt kóshirmesi Qazaqstan Prezıdenti Nursultan Nazarbaevqa tartý etildi.
Sondaı-aq Elbasyna qazaqstandyq ǵaryshker Talǵat Musabaev bergen ǵaryshta bolǵan Quran, 1838 jylǵy ensıklopedııalyq leksıkon da kitaphana qazynasyn baıytyp tur. Ondaǵy eń ejelgi kitap – 1667 jyly basylǵan «Sharıǵat normalary – aıattar men súrelerge negizdelgen qoljazba».
Tuńǵysh Prezıdentke dúnıejúzi memleketteriniń prezıdentteri, óner, mádenıet qaıratkerleri syılaǵan qoltańbasy bar kolleksııaǵa Sıngapýrdyń negizin qalaýshy áke Lı Kýan Iý-diń syıǵa tartqan kitaby, Ulybrıtanııanyń burynǵy Premer-mınıstri Margaret Tetcherdiń «Bılikke jol», úlken Djordj Býshtyń, Bıll Klıntonnyń «Meniń ómirim» kitaby qoıyldy. Sondaı-aq Amerıkanyń 44-prezıdenti Barak Obamanyń «Amerıkanyń eń ozyq ıdeıalary», QHDR tóraǵasy Sı Szınpınniń «Memlekettik basqarý týraly» kitaby da bar.
Reseı Federasııasynyń tuńǵysh prezıdenti Borıs Elsın óziniń «Zapıskı prezıdenta» kitabyna «Nursultan Ábishulyna avtordan qurmetpen!» dep qoljazba qaldyrǵan. Al «Pýt k vlastı» atty ómirbaıandyq kitabynda Ulybrıtanııanyń burynǵy Premer-mınıstri Margaret Tetcher Elbasyǵa jyly lebizin jetkizedi.
