Maıkl Iedon Pfizer kompanııasynda 2011 jylǵa deıin jumys istedi. Ol Sendvıchte Kent graftyǵynda Pfizer-diń allergııalyq jáne tynys alýdy zertteý bóliminiń jetekshi ǵylymı qyzmetkeri jáne vıse-prezıdenti bolǵan.
Bólimshe 2011 jyly jabyldy, Iedon Pfizer-den ketip, óziniń Ziarco kompanııasyn qurady. 2017 jyly ol ony Novaris kompanııasyna 325 mıllıon dollarǵa satady.
Maıkl Iedon COVID-19 pandemııasy bastalǵanda áleýmettik jelilerde tanymal boldy. Ol óziniń Twitter-degi paraqshasynda qastandyq teorııalary men vaksınasııaǵa qarsy ıdeıalaryn tarata bastady, olardyń bastysy KVI qarsy vaksınalar bedeýlikke ákeledi degen pikiri boldy.
Sondaı-aq ol maskalardyń paıdasy joq, al lokdaýn ólim-jitimniń artýyna ákeledi dep málimdedi.
Iedon taratqan taǵy bir feık Pfizer vaksınasyn synaýǵa qatysty. Onyń aıtýynsha, dári-dármektiń dozasyn eshkim eksperımentaldy túrde eseptemegen, demek adamdarǵa vaksınanyń qaýipsiz mólsheri egiletinine kepildik joq.
Osy jáne basqa da málimdemelerdi farmakologııa mamandary men sheteldik faktchekerler birneshe ret joqqa shyǵardy. Reuters basylym Iedondy «antıvakserlerdiń batyry», al The Times «COVID-19 týraly qastandyq teorııalarynyń keıipkeri» dep atady.
Qaznette taraǵan bes qadamnan turatyn jospar týraly málimdeme de, joǵaryda atalǵandardyń bári de múldem dáleldenbegen.
Iedon sıpattaǵan jospar BUU-nyń jańa álemdik tártip týraly jalǵan qujatynyń analogy bolyp tabylady. Ekeýiniń de túpki maqsattary – qarjy júıesin quldyratý, jeke menshikti joıý jáne adamzatty jappaı baqylaý.
