Yntymaqtastyqtyń ystyq yqylasy

Ultymyzdy uly murattarǵa bastaıtyn «Máńgilik El» ulttyq ıdeıasyn qoldaýǵa arnalǵan patrıottyq aksııa araıly Aqtóbe óńirine de kelip jetti. Asqar Altaıdan bastalǵan aksııany aqtóbelikterdiń de asyǵa kútkeni ańǵaryldy. Q.Jubanov atyndaǵy Aqtóbe óńirlik memlekettik ýnıversıtetiniń Stýdentter saraıyna jınalǵan ardagerlerdiń de, úkimettik emes uıymdar, kásipodaq, zııaly qaýym ókilderiniń de, etnomádenı birlestikter jetekshiliriniń de, joǵary jáne arnaýly oqý oryndary stýdentteriniń de júzi jarqyn, kóńilderi kóterińki. Bul da túsinikti, bul shara Qazaqstan Prezıdenti Nursultan Nazarbaevtyń «Qazaqstan joly – 2050: bir maqsat, bir múdde, bir bolashaq» atty Joldaýynda baıandalǵan «Máńgilik El» ıdeıasyn júzege asyrýdyń bastaýy dese de bolǵandaı. Máńgilik El bolýǵa umtylǵan Qazaqstannyń jasampazdyq isteriniń zańdy jalǵasy da. Stýdentter saraıyn kernegen jastardyń urandatqan daýysynan patrıottyq sezimniń, otanshyldyqtyń asqaq rýhy ańǵarylady. Boıyńdy elińe degen sheksiz súıispenshiliktiń kúshi kótermelep ketkendeı seziledi. Aksııa barysynda patrıottyq taqyrypta beınetaspa kórsetilip, eki márte Keńes Odaǵynyń Batyry Talǵat Bıgeldınov atyndaǵy áýe qorǵanys kúshteri áskerı ınstıtýtynyń kýrsanttary «Máńgilik El» emblemasy beınelengen tý ustap, arnaıy mýzykalyq kompozısııa qoıdy. Saltanatty jıyndy oblys ákiminiń orynbasary Sara Nurqatova ashyp, aksııaǵa qatysýshylarǵa sóz arnady. Ol aqtóbelikterdiń Elbasynyń, Qazaqstannyń bastamalarynyń qandaıyn da qyzý qoldaıtynyn jetkize kelip, elimizdiń aıqyn murattary belgilengen «Máńgilik El» ulttyq ıdeıasy bıylǵy Joldaýdyń basty tuǵyrnamasy, temirqazyǵy ekenine toqtaldy. Basqa qatysýshylar da osyǵan oraılas oı tolǵady. «Máńgilik El» ulttyq ıdeıasyn qoldaýshy­lar aksııasyna qatysýshylardyń qoldary qoıylǵan «Halyq tilegi» kitaby S.Nurqatovaǵa tapsyryldy. Bul patrıottyq forým birlikke, yntymaqqa úndegen shara retinde aqtóbelikterdiń esinde qaldy. Aksııa barysynda «Máńgilik El» ulttyq ıdeıasyn qoldaýǵa arnalǵan oblys turǵyndarynyń úndeýi joldandy. Alqaly jıynda Q.Jubanov atyndaǵy oblystyq fılarmonııanyń ánshileri oryndaǵan «Qazaqtaı el qaıda», «Atameken» ánderi aksııaǵa qatysýshy jas pen káriniń boıynda elge degen súıispenshilik sezimin oıatyp, jigerlendirdi. Al «Alǵa, Qazaqstan» ánine qoıylǵan horeografıkalyq qoıylymy da ózgeshe patrıottyq áserge bóledi. Aksııaǵa qatysýshy jalyndy jastar «Máńgilik El, Máńgilik Til, Máńgilik Rýh» dep urandatyp, sharany Qazaqstan Respýblıkasynyń Ánuranyn asqaq rýhta shyrqap aıaqtady. Aksııaǵa 500-den astam adam qatysty. Mundaı sharalar osymen bir mezgilde oblystyń on eki aýdanynda ótkizildi. Satybaldy SÁÝIRBAI, «Egemen Qazaqstan».   Aqtóbe oblysy.