Ulttyq qundylyqtar ulyqtaldy

Oblystyq ishki saıasat basqarmasy janynan qurylǵan «Qazaqtyń ulttyq salt-dástúrleri men ádet-ǵuryptary. Keshe. Búgin. Erteń» atty ǵylymı-ıntellektýaldyq aqparattyq toptyń kezekti otyrysyna joǵary jáne arnaýly oqý oryndarynyń oqytýshylary qatysty. Otyrysta oblystyq ishki saıasat basqarmasynyń basshysy Zápen Jumabaeva ulttyq qundylyqtardy saqtaý, ony nasıhattaý maqsatynda qolǵa alynǵan sharýalarǵa keńinen toqtaldy. Ol Elbasynyń bıylǵy Joldaýynda kóterilgen máselelerdi tarata áńgimeledi. – Bıylǵy Joldaýdyń burynǵylardan bir ereksheligi – «Máńgilik El» ıdeıasyn qalyptastyrýdyń alǵa qoıylýy bolyp tabylady. Elbasynyń bul bastamasyn júzege asyrýda ǵalymdar men ıntellektýaldyq toptyń kómegi qajet. Osy maqsatta basqarma janynan qurylǵan ǵylymı-ıntellektýaldyq aqparattyq top birqatar sharýalardy qolǵa aldy. Qala men aýyl-aımaqty aralap, aqparattyq jumystar júrgizýde. Top quramyna joǵary oqý oryndarynyń oqytýshylary men ustazdardyń biliktiligin jetildirý ınstıtýtynyń qyzmetkerleri kirdi. Aqparattyq top eń aldymen jastar arasynda belsendi jumys júrgizýi kerek. Sebebi, jastardyń qazirgi ashyq aqparattyń aǵynyna ilesip, jat aǵymdarǵa ermeýi, ózgelerge eliktemeýi tıis,– dedi Zápen Jaq­sybaıqyzy. Budan soń aqparattyq toptyń úılestirýshisi Erkin Qurmanbekov urpaq tárbıesine baılanysty baıandama jasady. Fılosofııa ǵylymdarynyń doktory Altaı Taıjanov ulttyq qundylyqtardy, salt-dástúrdi jańǵyrtý týraly oılaryn ortaǵa saldy. Satybaldy SÁÝIRBAI, «Egemen Qazaqstan». Aqtóbe oblysy.