Prezıdent • 06 Jeltoqsan, 2021

El arasyndaǵy baılanystar tyǵyz bolsa, aımaqtaǵy ahýal da turaqty – Qasym-Jomart Toqaev

141 ret kórsetildi

Aqorda saraıynda Qazaqstan astanasyna memlekettik saparmen kelgen О́zbekstan Prezıdenti Shavkat Mırzııoevti saltanatty qarsy alý rásimi ótti, dep habarlaıdy Egemen.kz Aqordanyń resmı saıtyna silteme jasap.

Qurmet qaraýyly rotasynyń bastyǵy memleketter basshylaryna raport bergennen keıin eki eldiń ánurandary oryndaldy. Budan keıin Qasym-Jomart Toqaev pen Shavkat Mırzııoev Shyǵys zalynda shaǵyn quramda kelissóz ótkizdi.

Qazaqstan men О́zbekstan basshylary ekijaqty strategııalyq seriktestiktiń keń aýqymdy máselelerin talqylady. Atap aıtqanda saıası, saýda-ekonomıkalyq, ınvestısııalyq, kólik tranzıttik, mádenı-gýmanıtarlyq yntymaqtastyq sııaqty negizgi aspektiler qarastyryldy. Sondaı-aq aımaqtaǵy, sonyń ishinde, qaýipsizdikti qamtamasyz etý jáne kópjaqty qurylymdar aıasyndaǵy ózara is-qımyl máseleleri sóz boldy.

Qasym-Jomart Toqaev qazaq-ózbek yntymaqtastyǵyn jańa deńgeıge kóterý turǵysynan, Shavkat Mırzııoevtiń qazaq jerinde ótip jatqan memlekettik saparynyń mańyzdy ekenin atap ótti.

– Biz búgin odaqtastyq qatynastar týraly Deklarasııaǵa qol qoıamyz. Buǵan deıin strategııalyq seriktestik qaǵıdalaryna súıenip kelgen bolsaq, aldaǵy ýaqytta bizdiń ózara qarym-qatynastarymyz shyn mánindegi jańa deńgeıge kóteriledi. Sondyqtan búgin qol qoıylatyn qujattar elderimizdiń arasyndaǵy yntymaqtastyqqa tyń serpin beredi dep esepteımin. Biz úkimetterimizge jaqyn arada saýda kólemin 3 mıllıard dollarǵa, keıinirek 10 mıllıard dollarǵa deıin jetkizý týraly tapsyrma berýge ýaǵdalastyq. Bul óte joǵary deńgeı, – dedi Memleket basshysy.

Qazaqstan Prezıdenti aımaqtaǵy turaqtylyq pen qaýipsizdikti qamtamasyz etý isindegi eki memlekettiń róli týraly aıtty.

– Elderimiz arasyndaǵy odaqtastyq, strategııalyq qarym-qatynastar – Ortalyq Azııa aımaǵyndaǵy turaqtylyq pen qaýipsizdikti qamtamasyz etýdiń mańyzdy faktory. Bul eshqandaı artyq aıtqandyq emes. Eki el arasyndaǵy baılanystar qanshalyqty tyǵyz bolsa, bizdiń mańyzdy aımaqtaǵy ahýal da sonshalyqty turaqty bolady, – dedi Qasym-Jomart Toqaev.  

Shavkat Mırzııoev qazaq jerinde kórsetilgen dástúrli qonaqjaılyq úshin rızashylyǵyn bildirip, óziniń jáne ózbek halqynyń atynan Qasym-Jomart Toqaevty jáne Qazaqstan halqyn Táýelsizdiktiń 30 jyldyq mereıtoıymen quttyqtady.

О́zbekstan basshysy Qazaqstan Prezıdentiniń basshylyǵymen elimizdiń jetken jetistikterin joǵary baǵalady. Sondaı-aq ol ekijaqty qatynastardyń damýyna Elbasy Nursultan Nazarbaevtyń zor úles qosqanyn atap ótti.

О́zbekstan Prezıdenti óziniń memlekettik sapary Qazaqstan Táýelsizdiginiń 30 jyldyǵy qarsańynda ótip jatqanynyń sımvoldyq máni bar ekenin aıtty. Ol eki el halyqtarynyń arasyndaǵy ǵasyrlar boı qalyptasqan dostyq qarym-qatynastar memleketaralyq baılanystardy nyǵaıtýǵa zor septigin tıgizetinine senim bildirdi. Sondaı-aq eki el úkimetteriniń osy sapar qarsańynda atqarǵan nátıjeli jumystaryn atap ótti.

Sońǵy jańalyqtar

Petropavlda jas jigitti KamAZ qaǵyp ketti

Aımaqtar • 27 Mamyr, 2022

Uqsas jańalyqtar