Qarsylasy – áıgili Ketı Teılor

Tumandy Albıon elinde uıymdastyrylǵaly otyrǵan jarystyń basty básekeleriniń birinde bizdiń Fırýza Sháripova óner kórsetedi. 27 jastaǵy Jam­byl boks mektebiniń túlegi kezinde áýesqoılar arasynda biraz tabysqa qol jetkizdi. Solardyń arasyndaǵy eń irisi – 2012 jyly Ulan-Batyrda ótken Azııa chempıonatynyń qola medali. Sháripova 2016 jyldan beri kásipqoı rıngte baq synaýda. О́ziniń tusaýkeser kezdesýinde ol Olımpııa oıyndarynyń kúmis júldegeri, álemniń eki jáne E­ýropanyń úsh dúrkin chempıony, reseılik Sofıa Ochıgavaǵa qarsy ótkizip, upaı sanymen ese jiberdi. Esesine sodan keıin qatarynan 14 jekpe-jekte jeńiske jetti. Segiz kezdesýdi merziminen buryn aıaqtady. Tanymal bapker Erik Alǵabektiń shákirti bul kúnderi túrli nusqalar bo­ıynsha altyn bel­beýdi ıelenýde.

Lıverpýlde Fırý­za Sháripova áıgili Ketı Teı­lormen kúsh synasady. Bul básekede jeńil salmaq dárejesi boıynsha WBC, WBA, WBO jáne IBF nusqalarynyń chempıondyq belbeýi sarapqa salynady. Birden aıta keteıik, bul jekpe-jektiń favorıti – Teılor. 35 jastaǵy Irlandııanyń Breı qalasynyń týmasy kezinde áýes­qoı rıngti armansyz shaı­qaǵan edi. 60 kılo salmaq dárejesinde synǵa túsken ol 2006-2016 jyldar aralyǵynda London Olımpıadasynyń jeńimpazy, bes dúrkin álem jáne alty dúrkin Eýropa chempıony atandy.

2012 jyly Londonda alaýy tutanǵan Olımpııa oıyndarynyń ashylý saltanatynda dál osy Ketı Irlandııanyń týyn us­tap shyqqany esimizde. О́zine artylǵan senimdi tolyǵymen aqta­ǵan ol Tumandy Albıonda al­tynnan alqa taqty. Fınalda Teılor reseılik Sofıa Ochı­gavany utty. Kezinde aıtýly boksshy qarsylas shaq keltirmeı, qatarynan bes ret álem chempıo­natynda top jarǵany jaıynda biz joǵaryda aıttyq. Sodan 2016 jyly altynshy ret altyn alamyn dep Astanaǵa julqynyp kelgen edi. Biraq Qazaqstannyń bas shaharynda Ketıdiń joly bolmady. Jartylaı fınalda ol bolashaq álem jáne Olımpıada chempıony, fransııalyq Estel Mosselıge ese jiberdi.

Jalpy, 2016 jyl Ketı Teı­lor úshin asa tabysty bolmady. Astanada qola medaldy qanaǵat tutqannan keıin ol sol olqylyqtyń ornyn Rıo Olım­pıadasynda toltyramyn dep oılady. Biraq Brazılııada da onyń baǵy janbady. Shırek fınaldyq saıysta Teılor oıda-joqta fınlıandııalyq Mıra Patkonnenen jeńilip qaldy. Osy sátsizdikten keıin Ir­lan­­­dııanyń dańqty boksshysy kásipqoılar arasynda kúsh sy­nasýǵa bel býdy. Sol kezden beri sharshy alańǵa alty ret kóterilgen Ketı barlyq básekeni óz paıdasyna sheship, tórt qarsylasyn no­kaýtqa jiberdi. Mine, Lıver­pýldegi jarys­ta bizdiń Fırýza Sháripovany osyn­daı myqty qarsylas kútip tur.