«6-9 qarasha aralyǵynda Qarasaı aýdandyq polısııasynyń kezekshi bólimine jergilikti turǵyndar qarýly shabýylǵa tap bolǵany týraly shaǵym túsirdi. Tirkelgen 3 epızodta da tapansha men pyshaq ustaǵan, betine medısınalyq maska kıip, basyn kapıýshonmen búrkemelegen 3 jigit kózge túsken. Kúdiktiler túnde jalǵyz júrgen adamdardy qarýmen qorqytý arqyly quny 330 myńnan 840 myń teńgege deıin jetetin uıaly telefondardy tartyp alyp otyrǵan. Is bitken soń kúdiktiler kúmis tústi Hyundai Elantra kóligine otyryp, iz jasyrǵan. Atalǵan fakti QR Qylmystyq kodeksiniń «Toptyq qarýly qaraqshylyq» baby boıynsha tirkeldi», delingen Qarasaı aýdandyq polısııasy taratqan habarlamada.
Jedel-izdestirý jumystaryn júrgizgen saqshylar kúdiktilerdi Almaty qalasynan ustaǵan.
«Buǵan deıin olardyń tonaý, qaraqshylyq, densaýlyqqa aýyr zııan keltirý jáne urlyq sııaqty qylmys jasaǵany úshin sottalǵany anyqtaldy. Kúdiktilerden pyshaq, tapansha jáne urlanǵan úsh telefonnyń ekeýi tárkilendi. Al olardyń astyndaǵy kólik jalǵa alynǵan bolyp shyqty. Tergeý soty 3 aıyptalýshynyń da buryn sottalǵanyn eskerip, sotqa deıingi tergeý kezinde qamaýda ustaý túrindegi bultartpaý sharasyn taǵaıyndady», delingen habarlamada.
