Áıelge qamqorlyq – bolashaqqa qamqorlyq

Al ol elimizde óz deńgeıinde me?

Halyqaralyq áıelder kúni qarsańynda Qazaqstan Kommýnıstik halyqtyq partııasy Ulttyq baspasóz klýbynda «Áıelge qamqorlyq – bolashaqqa qamqorlyq» degen taqyrypta talqylaý ótkizip, áıelderdiń basyndaǵy problemalardy sheshýdiń joldaryn ortaǵa saldy. Sharaǵa Parlament Máji­lisindegi Halyqtyq kommýnıster fraksııasynyń depýtattary Jambyl Ahmetbekov pen Aıqyn Qońyrov jáne arnaıy shaqyrylǵan eki jas ana qatysty. Aldymen sóz alǵan J.Ahmetbekov ótken aptada partııanyń uıyt­qy bolýymen óńirlerde áıel­der qaýymynyń áleýmettik jaǵ­daıyna qatysty  dóńgelek ústel­der ótkenin tilge tıek etti. Bul baspasóz máslıhaty sonyń qory­tyn­dysyna arnalǵandyǵyn alǵa tartqan depýtat áıelderge qam­qorlyq memlekettiń úlken saıasatynyń biri bolýǵa tıis ekenin atap kórsetti. Qazirgi tańda elimizde tuńǵysh balaǵa tólenetin aı saıynǵy járdemaqynyń kólemi 10186 teńgeni quraıtyndyǵyn alǵa tartqan halyqtyq kommýnıster elimizdegi eń tómengi ómir súrý kórsetkishi 19966 teńge ekendigin qaperge saldy. Bul arada bir balany mektepke daıyndaý respýblıka boıynsha 30 myń teńgeni quraıtyny kóldeneń tartyldy. Al 2014 jyly elimizde bir jolǵy memlekettik járdemaqy 1, 2 jáne 3 balaǵa 55 000 teńgeni quraǵan. Depýtattar járdemaqyny ózge eldermen salystyra otyryp, onyń mardymsyz ekenine nazar aýdardy. Mysaly, 2013 jylǵy kórsetkish boıynsha Sıngapýrda bir jolǵy járdemaqy – 4900, Belarýste – 1000-1500, Reseıde 3000 dollar shamasynda eken. Fransııada bala týyp, úsh jylǵa dekrettik demalysqa ketken ana aı saıyn 400 eýroǵa deıin járdemaqy alatyn kórinedi. Osylardyń barlyǵyn orta­ǵa salǵan QKHP depýtat­tary áıelderge qosymsha jeńil­dikter usynýdy jáne bala kúti­min­de otyrǵan analar men bola­shaq analarǵa qarjylyq kómek­tiń kólemin ulǵaıtýdy qoldaı­tyn­dyqtaryn dáıekteýge tyrysty. Olardyń pikirinshe, birin­shi balaǵa beriletin birjolǵy jár­demaqyny eki esege kóbeıtken durys. Sondaı-aq, Ákimshilik kodeks­ke engizilgen ózgerister men to­lyq­tyrýlardyń jańa bap­tary boıynsha aıaǵy aýyr áıelder­di jumystan shyǵýǵa májbúr­legenderdi aıyppulmen jáne qyzmetinen tómendetý jazasymen jazalaý oryndy bolmaq. Budan basqa, halyqtyq kommýnıster bala kútimine baılanysty beriletin aı saıynǵy mem­lekettik járdemaqy merzimin 3 jasqa deıin uzartýdy da usyn­dy. J.Ahmetbekov kóp balaly otbasylarǵa da erekshe qamqor­lyqtyń qajettigin alǵa tartty. Onyń aıtýynsha, eger otbasynda úsh bala bolsa, onda kommýnaldyq qyzmettiń 30 paıyzyn ótep bergen oryndy bolmaq. Al 4-5 balaly ot­basylarǵa 50 paıyz jeńildik berip, 7 jáne odan kóp balaly otbasylardy kommýnaldyq qyz­metke aqy tóleýden múldem bosatý kerek. Baspasóz máslıhatyna arnaıy kelgen jalǵyzbasty ana Sharıhat Imanbaevanyń málimetine qaraǵ­anda, Qazaqstanda 100 myń bala áke­lerinen alıment ala almaı júr eken. Sondyqtan da ol áke­ler­ge qatysty jaýapkershilikti qatań­datýdy usyndy. Jalpy, baspasóz máslıhatyn ótkizýdegi basty maqsat áıelderdiń problemasyna nazar aýdartý boldy. Asqar TURAPBAIULY, «Egemen Qazaqstan».