Mıllıard teńgeniń munaıy qoldy boldy

Aqmola oblysyndaǵy «Bahyt Petrol Group» JShS dep atalatyn kásiporyn aıdyń-kúnniń amanynda Pavlodar munaı-hımııa zaýytyn mıllıard teńgege jýyq aqshaǵa shyǵynǵa batyrdy da qoıdy. Qylta astynda tyǵylyp jatqan bul qylmysty Aqmola oblysynyń Qarjy polısııasy anyqtady. Osyǵan baılanysty atalmysh aımaqty qarjy polısııasynyń depar­tamenti qazir «Bahyt Petrol Group» seriktestigin basqaratyn laýazymdy tulǵa­lardyń ústinen qylmystyq is qozǵady. «Atalmysh jaýapkershiligi shekteýli seriktestiginiń laýazymdy tulǵalaryna 2013 jyldyń qańtarynan qazirgi kezge deıin «Pavlodar munaı-hımııa zaýyty» aksıonerlik qoǵamynan saqtaýǵa qabyldaǵan 3600 tonnadan astam AI-92 markaly benzın men kólemi 4500 tonnadan asatyn AI-80 markaly benzındi urlady degen aıyp taǵylýda. Zaýytqa osy arqyly 900 mln. teńgeden astam shyǵyn keldi», – dedi departament baspasóz qyzmetindegiler. Qazir qylmystyq is Qylmystyq kodekstiń 176-baby 4-tarmaǵy «b» tarmaqshasy boıynsha tekserilýde. Qarjy polısııasy onyń nátıjesin sońynan jurtshylyqqa jarııa etýge ýáde etip otyr. Qurysh NURYMBET.