06 Naýryz, 2014

Yqpaldastyqtyń belsendi sıpaty

205 ret
kórsetildi
2 mın
oqý úshin
Qazaqstan Respýblıkasynyń Syrtqy ister mınıstri Erlan Ydyrysovtyń Fınlıandııa Parlamentiniń spıkeri Eero Heınıalýomamen kezdesýi bolyp ótti. Kezdesý barysynda taraptar saıası, ekonomıkalyq, áleýmettik, mádenı-gýmanıtarlyq jáne basqa da salalardaǵy ekijaqty yntymaqtastyqtyń damý bolashaǵyn, sonymen qatar, birqatar halyqaralyq kún tártibindegi máselelerdi talqyǵa saldy. Eki el arasyndaǵy sońǵy jyldardaǵy qarym-qatynas belsendi bola túskeni atap ótildi. Bul barlyq deńgeılerdegi ózara sapar almasý jıiliginen de baıqalady. 2013 jylǵy sáýirde Fınlıandııa Prezıdenti S.Nıınıstıoniń Qazaqstanǵa sapary bolyp ótti. Onyń barysynda saıası jáne ekonomıkalyq salalardaǵy mańyzdy kelisimderge qol jetkizildi, bolashaqtaǵy ekijaqty yntymaqtastyqtyń basym baǵyttary aıqyndalyp, Qazaqstan-Fınlıandııa  qarym-qatynasynyń negizgi salalaryn retteıtin aıtarlyqtaı aýqymdy qujattar toptamasyna qol qoıyldy. Parlamentaralyq baılanystardy belsendilendirýge toqtala kele, E.Ydyrysov parlamentaralyq deńgeıdegi sapar almasýlar bizdiń elderimiz arasyndaǵy saıası únqatysýdy damytýda aıtarlyqtaı mańyzǵa ıe ekenin atap ótti. «Fın parlamentshileriniń qyzmeti, olardyń zańnamalyq jobalarmen, ásirese, ınnovasııalyq damý, bilim berý júıesin jetildirý, ekonomıkaǵa «ekologııalyq» ustanym salalaryndaǵy jumys isteý tájirıbesi jáne jalpy memleket pen azamattyq qoǵamdy jańǵyrtýdaǵy tájirıbesi Qazaqstan úshin paıdaly bolýy múmkin», dedi mınıstr. Sonymen qosa, ekonomıka sala­syndaǵy yntymaqtastyq belsendi sıpat alǵany atap ótildi. Qazaqstan men Fınlıandııa arasyndaǵy ózara saýda kórsetkishi 2013 jyly 916,5 mln. AQSh dollaryna deıin ulǵaıdy. Osy oraıda Qazaqstan men Fınlıandııa arasyndaǵy saýda-ekonomıkalyq yntymaqtastyq jónindegi Úkimetaralyq komıssııa róliniń ereksheligi ataldy. Sondaı-aq, taraptar týrızm, ınnovasııa jáne energııa únemdeýshi teh­no­logııalar salalaryndaǵy ózara yqpaldastyq máselelerin de nazardan tys qaldyrmady. Saýda men týrızm­niń damý serpilisine baılanys­ty bizdiń elderimiz arasynda tikeleı áýe qa­tynasyn ashýdyń obektıvti qajettiligi týyndap otyrǵandyǵyna nazar aýdaryldy. Kezdesý barysynda taraptar kóp­jaq­ty ınstıtýttar aıasyndaǵy ózara yn­ty­maqtastyq máselelerin de qarastyrdy. Halyqaralyq máselelerdiń negizgileri boıynsha ustanymdar jaqyndyǵy, so­nymen qatar, eki eldiń teńgerimdi syrt­qy saıasaty atap ótildi. «Egemen-aqparat».