Saltanatty shara eki bólimnen turdy: resmı jáne merekelik konsert.
Resmı bólimdi Saryarqa aýdanynyń ákimi Eset Baıken ashty. Ol aýdannyń damýy týraly aıtyp, elordalyqtardy aldaǵy merekemen quttyqtady.
«Táýelsizdik – halqymyzdyń basty qundylyǵy. Egemendiktiń 30 jyly ishinde elimiz barlyq qıyndyqtardy eńserip, halyqaralyq arenaǵa shyqty. Táýelsizdigimizdiń jarqyn jetistikteriniń biri – elorda. Saryarqa aýdany elordanyń qalyptasýyna kýá boldy. Árqaısyńyz elimizdiń ıgiligi úshin eńbek etip kelesizder! Barsha qazaqstandyqty Táýelsizdik kúnimen quttyqtaımyn!», dedi Eset Baıken.
О́z kezeginde, qalalyq máslıhattyń hatshysy Erlan Kanalımov jumysyn sol kezde halyq eń kóp qonystanǵan Saryarqa aýdanynda bastaǵanyn atap ótti.
«30 jyl ishinde elimizde úlken ózgerister boldy. Elbasynyń ustanǵan saıasatynyń arqasynda aınalamyzdaǵy kórshilermen kelissózder júrgizilip, memlekettik shekaramyz shegendeldi, áleýmettik-ekonomıkalyq, demografııalyq, ekologııalyq reformalar jasaldy. Elbasynyń eń uly sheshimderiniń biri – astanany Aqmolaǵa kóshirý. Ol kezde shaǵyn provınsııalyq qalada nebári 150 myń turǵyn bolatyn. Men óz qyzmetimdi 2002 jyly Saryarqa aýdanynda bastadym. Ol kezde eki aýdannyń ishinde Saryarqanyń turǵyny kóp boldy. Qazir qalamyzda 4 aýdan bar. Qala ósip keledi, úıler salynyp jatyr, al munyń bári atqarylǵan eńbektiń arqasynda. Men astanamyzdyń jáne búkil eldiń ıgiligi úshin eńbek etken jandarǵa alǵysymdy bildirgim keledi. Elordamyz búkil respýblıka damýynyń lokomotıvine aınaldy. Elimizdiń árbir turǵynyna ashyq aspan, myqty densaýlyq, baq-bereke tileımin! Árbir januıada amandyq bolsyn, al elimiz odan ári órkendeı bersin!» - dedi Erlan Kanalımov.
Sonymen qatar, Nur-Sultan qalasynyń qoǵamdyq keńesiniń tóraǵasy Sansyzbaı Esilov elordalyq ardagerlerge qalanyń qalyptasýy men damýyna qosqan úlesi úshin alǵys bildirdi.
«Táýelsizdik kúni – halqymyz úshin eń basty mereke. Bul kúndi ata-babamyz uzaq ýaqyt boıy kútken. Saryarqa aýdany qalanyń tarıhı bóligin saqtap qaldy. Meniń búkil ómirim osy qalamen jáne Saryarqa aýdanymen tikeleı baılanysty. Búgingi basqosýymyzǵa qala ıgiligi úshin uzaq ýaqyt eńbek etken ardagerlerimiz qatysyp otyr. Elordamyzdyń negizin qalaǵan ardagerlerge alǵysymdy bildirgim keledi. Jastarǵa aıtarym: táýelsizdigimizdi qadirleńizder. Eń aldymen, eńbek etińiz, al qajet bolsa, egemendigimizdi qorǵańyzdar», dep atap ótti ol.
Resmı bólim barysynda Saryarqa aýdanynyń turǵyndaryn aýdannyń nemese qalanyń ǵana emes, eldiń damýyna qosqan úlesi úshin marapattaý rásimi ótti.
QR Prezıdentiniń Jarlyǵymen «Qazaqstan Táýelsizdigine 30 jyl» tósbelgisin 12 adam, «Halyq alǵysy» medalin 8 adam taqty. Qala ákimi men aýdan ákiminiń alǵys hattary qalamyzdyń 40 turǵynyna tapsyryldy, olardyń arasynda qoǵam qaıratkerleri, belsendi qala turǵyndary, ardagerler, áleýmettik mańyzy bar mamandyq ıeleri bar. Sol sııaqty «Altyn alqa» jáne «Kúmis alqa» tós belgilerimen marapattalǵan aýdannyń kópbalaly analary da nazardan tys qalǵan joq.
Saltanatty shara qazaqstandyq estrada juldyzdary men Nur-Sultan qalasy ákimdiginiń memlekettik akademııalyq fılarmonııasynyń merekelik konsertimen jalǵasty.
