Toqsannyń tórinde

Ejelden kele jatqan ata dástúrimizde de, táýelsiz elimizdiń qoǵamdyq ómirinde de anaǵa degen qadir-qurmet, árıne, erekshe. Áńgimemizdiń ózegine aınalyp otyrǵan Balajan  Ábilqyzy ájemiz bul kúnderi toqsan jastyń tórine shyǵyp, mereıi tasyp otyr. Balajan apa ómirdegi qıyn­shylyqty da, qııanatty da, jaq­sylyq pen jamandyqty da basynan ótkergen jandardyń biri. Ol tylda jumys istep eńbek ardageri atanǵan qurmet ıesi. Búginde beınetiniń zeınetin kórip otyrǵan keıýana Táýelsizdiktiń baıandy zamanyna kýá bolǵanyna myń da bir shúkirshilik etedi. Toqsandaǵy júrek tebirense, týǵan óńirdiń syry da, jyry da keıipker apamyzdyń ómirimen ózektes ekenine anyq kóz jetki­zemiz. Endeshe, ájemiz bylaı dep tolǵaıdy. – Biz Sozaq óńiriniń týmasymyz. Bizdiń jaqta Babatúkti Shashty Áziz, Ysqaq bab, Qarabýra áýlıe, Sańǵyl bılerdiń kıeli oryndary bar, olar týraly tarıhı ápsanalar kóp aıtylady. Syılasyp tur­mys qurǵan otaǵasym Qýan Meıir­bekuly sharýaqor azamat edi. Bul áýlet te Qazan tóńkerisinen ke­ıingi qatygez zamannyń zardabyn tartqan adamdar. Meıirbek atamyz da bala oqytyp, molda bolǵan. Amal qansha, ol kisi de arsyz ómirden opyq jedi. Halyqty dinge ýaǵyzdady, Keńes ókimetine qarsy shyqty degen jeleýmen naqaqtan jala jabylyp, 37-jyldyń náýbetine tap kelip, mert bolyp ketti. Al onyń uly Qýannyń da basyna qara bult úıiriledi. Sóıtip, júrip soǵysqa ketip, odan jaraly bolyp oraldy. Otaý quryp, balaly-shaǵaly boldy. Bireýdiń ala jibin attamaǵan otaǵasym balalaryn jetkizem dep júrip jetpis jasynda dúnıe saldy, – deıdi apamyz ótken ómirin eske alyp. – Marqum únemi aǵynan jarylyp, balalarynyń tileýin tilep otyrýshy edi. Ul-qyzdarymyzdy qoldan kelgenshe aıalap ósirip, oqytyp, tárbıeleýge kúsh saldyq.  Otaǵasym dúnıe salǵan soń, amal joq úıdiń bar aýyrtpalyǵy meniń ıyǵyma tústi. Taǵdyrdyń tap kelgen taýqymetine tapjylmaı tózip, kezdesken synnyń bárin jeńip shyǵýǵa týra keldi. Qınalyp júrip adal eńbek ettim. Balalarymnyń bárin de taryqtyrmaı ósirdim. Qudaıǵa shúkir, eshqaısysy da jaman bolmady. Úmitimizdi aqtady. Sonyń arqasynda Allanyń bergen jasyn jasap, eńbegimniń zeınetin kórip otyrmyn. Baldaı tátti balalarym – Orynkúl, Serik, Berik, Berdibek, Raıhan, Raýshan, Qaldykúlden 30-shaqty nemere, 20-dan astam shóbere súıip, órkenimiz ósip jatyr, táýbe. Atalarynyń jolyn jalǵastyryp, el aýzyna iligip, halyq senimin arqalap júrgenderi de barshylyq. Úlken ulym Serik qarjy salasynyń qyzmetkeri. Odan keıingi uldarym da jaýapty qyzmetter atqaryp júr. Nemerelerim de er jetip ár salada eńbek etýde. Úsh birdeı nemerem Anglııada oqyp jatyr. Balajan Ábilqyzy seksenniń seńgirine shyqqanda musylmandyq paryzyn ótep qajy atandy. Osy qutty saparyn apamyz «Iman­dylyq jolynda ótken atalar rýhynyń rızashylyǵy úshin de, balalarymnyń qoldaýymen Mekke-Madınaǵa jol tarttym. Alla taǵalaǵa jalbarynyp, balalarym men urpaqtarymnyń amandyǵyn, el-jurtymnyń baqýatty bolýyn tiledim», dep túıedi. Iá, Elbasynyń tikeleı tarapynan jasalyp jatqan qam­qor­lyqtyń arqasynda bizdiń mem­leketimizde Balajan apa tárizdi áziz ájeler, baqýatty apalar kó­beıe beretindigi sózsiz. Al bú­gingi kúni 90 jastyń tórine shat-shadyman kúımen órlegen toı ıesin mereıli shaǵymen shyn júrekten quttyqtaımyz. Jasaı berińiz, apa deımiz. Tortaı QÝANYShBAEV.