Onlaın sheberlik synyptaryna Qazaqstannyń oblys ortalyqtarynda ornalasqan 11 fılarmonııanyń seksennen astam qyzmetkeri qatysty. 4 apta boıy kúnine 8 saǵattan tyńdaýshylar marketıng, menedjment, rejıssýra, shyǵarmashylyq ónimdi ilgeriletý, hor jumysynyń, orkestr dırıjeri jumysynyń erekshelikteri men múmkindikteri, qazaq bıiniń negizderi, zamanaýı kompozısııa tehnıkasy, dástúrli ujymmen jumys boıynsha dárister tyńdap, ózekti máselelerdi talqylady.
Sheberlik synyptarynyń dáristeri 20 saǵattan turatyn 8 modýlge bólingen. Ár modýl boıynsha óz salasynda aıtýly jetistikterge jetken, kásibı mamandar dáris oqydy. Olardyń qatarynda Qazaqstannyń eńbek sińirgen qaıratkeri, «Astana Opera» teatrynyń mýzykalyq jetekshisi, dırıjer Abzal Muhıtdenov, Qazaq ulttyq óner ýnıversıtetiniń professory, Qazaqstannyń eńbek sińirgen qaıratkeri, Erkeǵalı Rahmadıev atyndaǵy memlekettik akademııalyq fılarmonııanyń Kameralyq horynyń jetekshisi ári bas dırıjeri Gúlmıra Quttybadamova, Nur-Sultan qalasy ákimdiginiń sımfonııalyq orkestriniń kórkemdik jetekshisi jáne dırıjeri Berik Batyrhan, «Qazaqstan kompozıtorlar qaýymdastyǵy» qoǵamdyq birlestiginiń tóraǵasy Artyq Toqsanbaev, Qazaqstannyń eńbek sińirgen qaıratkeri, kompozıtor, pıanınoshy Gúljan О́zenbaeva, Qazaq ulttyq óner ýnıversıtetiniń professory Janǵalı Júzbaı, Jambyl atyndaǵy Qazaq memlekettik fılarmonııasynyń dırektory, «Turan» etno-folklorlyq ansambliniń múshesi Serik Nurmoldaev, Qazaq ulttyq horeografııa akademııasynyń aǵa oqytýshysy Anvara Sadyqova, Qazaqstannyń eńbek sińirgen qaıratkeri, rejısser Qarlyǵash Ájıeva, JD Expert agenttiginiń negizin qalaýshy, konsýltant Iýlııa Dmıtrıeva, bıznes-trener, fasılıtator Anna Pasıýk bar.
Qazaqstannyń eńbek sińirgen qaıratkeri, dáýlesker kúıshi Janǵalı Júzbaı qazaq halqynyń kúı óneri, dástúrli kúıshilik mektepter, onyń ishinde Altaı-Tarbaǵataı, Arqa, Jetisý, Qarataý, Jıdeli-Baısyn, Syr, Atyraý, Mańǵystaý kúıshilik mektepteri jaıly dárister oqydy. Kúıshi shertpe jáne tókpe kúılerdiń tarıhyn baıandap, árqaısynyń erekshelikterin taldap, kúı óneriniń damýyna ótken zamandary úles qosqan tulǵalar jaıly jáne búginde atsalysyp júrgen qaıratkerler týraly maǵlumat berdi.
«Bul – arnaıy ǵylymı negizdelgen úlgisi bar úlken joba. Árıne, osyndaı jumystardyń kóp bolǵany durys. Myna bizdiń qazirgi mýzykalyq, fılarmonııalyq, konserttik qaıratkerligimizdegi jınalyp qalǵan qyrýar problemalarymyz óte kóp. Solardy mynaý áriptestik aıasynda sheshýdiń bir jaqsy joldary myna onlaın dárister boldy. Sondyqtan onlaın dáristerdi uıymdastyrǵan barsha áriptesterime, jobanyń jetekshisi Gúlmıra Quttybadamovaǵa men alǵysymdy bildiremin», dedi Janǵalı Júzbaı.
Onlaın sheberlik synyptaryna qatysýshylar «Jobalyq komandany tıimdi basqarýdyń zamanaýı ádisteri» taqyrybyna zor qyzyǵýshylyq tanytty. Modýl dáriskeri Anna Pasıýk tyńdaýshylarmen menedjmenttiń negizgi mindetteri, jınalystar men keńesterdi qalaı ótkizý kerek, ár qyzmetkerdi ortaq iske qalaı jumyldyryp, yntalandyrýǵa bolady, jumys barysynda ketken qatelikter jaıly qyzmetkerlermen qalaı áńgimelesý qajet degen sııaqty máselelerdi egjeı-tegjeı talqylady.
«Mádenıet salasynda mundaı aýqymdy dárister oqyǵan joq edim. Biraq bul men úshin óte mańyzdy boldy. Sebebi basqarý tehnologııasy, marketıng tehnologııasy bıznes, mádenıet salasy bolsyn, barlyq jerde birdeı. О́ner adamdarynyń, shyǵarmashylyq mamandyqtardaǵy basqarýshylardyń, jetekshilerdiń osyndaı zamanaýı basqarý tásilderin zertteýi, oqyp-úırenýi asa mańyzdy. Sondaı-aq, mundaı aqparattyń qoljetimdi bolýy eki ese mańyzdy. Ekinshiden, menedjment taqyrybyna bólingen saǵat óte kóp. Iаǵnı, biz osy ýaqyt ishinde bul salany jan-jaqty, keshendi qarastyryp, talqylap úlgerdik. Basqa da, bızneske, mysaly marketıngke dál osylaı kóp kóńil bólingen jáne barlyq modýlder, dárister bir júıege negizdelip qurylǵan. Bul óte tamasha dep sanaımyn. Sondyqtan bul jobaǵa men qýana qatysyp, bar bilgenimmen bólistim», dedi Anna Pasıýk.
Onlaın sheberlik synyptaryna belsendi qatysqan barlyq tyńdaýshylarǵa sertıfıkattar tabystaldy.
