Qoǵam • 24 Jeltoqsan, 2021

Qazaqstan men AQSh strategııalyq seriktestik jóninde málimdeme jasady

80 ret kórsetildi

2021 jylǵy 15 jeltoqsanda Nur-Sultan qalasynda Qazaqstan Respýblıkasy Syrtqy ister mınıstriniń orynbasary Aqan Rahmetýllın men AQSh Memlekettik hatshysynyń Ońtústik jáne Ortalyq Azııa isteri jónindegi kómekshisi Donald Lý Qazaqstan-AQSh Keńeıtilgen strategııalyq seriktestik jónindegi komıssııanyń (KSSK) jyl saıynǵy otyrysyn tabysty ótkizdi, dep habarlaıdy Egemen.kz.

Memlekettik hatshynyń kómekshisi Donald Lý Qazaqstan Táýelsizdiginiń 30 jyldyǵyna oraı quttyqtaý joldady.

30 jyldyq mereıtoı sheńberinde Amerıka Qurama Shtattary Qazaqstannyń táýelsizdigine, aýmaqtyq tutastyǵyna jáne egemendigine qoldaýyn bildirdi. Eki tarap AQSh pen QR arasyndaǵy dıplomatııalyq qarym-qatynastyń 30 jyldyǵyn atap ótti. 

Joǵary deńgeıdegi delegasııalar birqatar túıindi ekijaqty jáne aımaqtyq saıası, ekonomıkalyq, sondaı-aq qaýipsizdik máselelerin talqylady.

Amerıka Qurama Shtattary QR Prezıdenti Q.Toqaevtyń saıası reformalaý jónindegi kúsh-jigerin, onyń ishinde 2021 jylǵy 9 maýsymdaǵy «Qazaqstan Respýblıkasynyń Adam quqyqtary salasyndaǵy odan ári sharalary týraly» jarlyǵyn quptady. Eki tarap 2022 jyldyń basynda Demokratııalyq reformalar jónindegi joǵary deńgeıdegi Dıalogtyń alǵashqy kezdesýine daıyndyqty bastaýǵa ýaǵdalasty.

AQSh Qazaqstanǵa terrorızmge qarsy kúres, shekara qaýipsizdigi, bitimgershilik, ıadrolyq qarýdy taratpaý, klımattyń ózgerýi jáne aımaqtyq qaýipsizdik sııaqty ortaq syn-qaterlerdi sheshýdegi berik seriktestigi úshin óziniń alǵysyn bildirdi.

Amerıka Qurama Shtattary Qazaqstannyń soǵys aımaqtaryndaǵy azamattardy jáne olardyń otbasylaryn repatrıasııalaýdaǵy kóshbasshylyǵyn joǵary baǵalap, olardy ońaltý men qaıta qalpyna keltirý salasyndaǵy yntymaqtastyqty jalǵastyrýǵa mindettendi. Qatysýshylar ıadrolyq qarýdy taratpaý qaǵıdattary men tájirıbesinde Qazaqstan jahandyq kóshbasshy ekenin atap ótti.

Amerıka Qurama Shtattary Semeı ıadrolyq polıgonynyń qaýipsizdigin qamtamasyz etý jáne qalpyna keltirý úshin Qazaqstanmen tyǵyz seriktestik ornatýǵa nıetti bolyp qala berýde.

Syrtqy ister mınıstriniń orynbasary A.Rahmetýllın men Memlekettik hatshynyń kómekshisi D.Lý Amerıka Qurama Shtattary men Qazaqstannyń aýǵan halqyna gýmanıtarlyq qoldaý kórsetýdi jalǵastyrýǵa nıetti ekendikterin bildirdi. Amerıka Qurama Shtattary USAID qyzmetkerleriniń Kabýldan Almatyǵa ýaqytsha aýystyrylýyna rızashylyǵyn bildirip, Qazaqstannyń Almatyda aımaqtyq gýmanıtarlyq hab qurý bastamasyn atap ótti. Eki tarap C5+1 jáne saýda men ınvestısııalyq negizdemelik kelisim (TIFA) aıasynda aımaqtyq ózara is-qımyldy odan ári jandandyrýǵa qoldaý bildirdi.

Memlekettik hatshynyń kómekshisi Lý Qazaqstanda júrgizilip jatqan reformalar baǵdarlamasyn quptady jáne taraptar amerıkalyq kompanııalardyń Ekonomıkalyq yntymaqtastyq jónindegi qazaqstandyq-amerıkalyq jumys tobynyń turaqty otyrystary ózara múddelerge yqpal etetinin ataı otyryp, Qazaqstandaǵy saýda aınalymy men ınvestısııasyn keńeıtý múmkindikterin talqylady.

Qatysýshylar sanksııalardyń Qazaqstan ekonomıkasyna kútpegen saldary bolýyna jol bermeý etý boıynsha konsýltasııalardy jalǵastyrýǵa kelisti. Amerıka Qurama Shtattary ekonomıkalyq baılanystardy nyǵaıtýǵa yqpal etetin Qazaqstannyń Dúnıejúzilik saýda uıymynyń On ekinshi mınıstrler konferensııasyna tóraǵalyǵyn quptady. Taraptar Qazaqstan men Amerıka Qurama Shtattary arasynda «turaqty qalypty saýda qatynastaryn» ornatý múmkindigin talqylady.

Saýda jáne ıntegrasııa vıse-mınıstri Qaırat Tórebaev pen Ońtústik jáne Ortalyq Azııa jónindegi aǵa keńesshi Afrın Ahter ǵylym jáne tehnologııa salasyndaǵy yntymaqtastyqty, sondaı-aq aǵylshyn tili men bilim almasý, áıelderdiń saıası, áleýmettik jáne ekonomıkalyq múmkindikterin keńeıtý, sondaı-aq aımaqtyq órkendeý men ózara baılanystylyqqa járdemdesetin birlesken bastamalardy talqylady. Sonymen birge, taraptar áskerıler, quqyq qorǵaý organdary, shekara jáne keden organdary arasyndaǵy baılanysty tereńdetý arqyly qaýipsizdik salasyndaǵy yntymaqtastyqty, onyń ishinde Qazaqstan Qorǵanys mınıstrligi men Amerıka Qurama Shtattary Qorǵanys mınıstrligi arasyndaǵy áskerı yntymaqtastyqtyń Tórtinshi besjyldyq jospary sheńberinde nyǵaıtýdyń mańyzdylyǵyn atap ótti.

Eki tarap tıimdi energııa jáne jasyl tehnologııalardy damytýǵa qyzyǵýshylyq tanytty. Qatysýshylar C5+1 aıasynda klımattyq máseleler boıynsha ótken mınıstrlik otyrysynyń nátıjelerin talqylady. Amerıka Qurama Shtattary Qazaqstannyń 2060 jylǵa qaraı kómirtegi beıtaraptyǵyna qol jetkizý jáne 2030 jylǵa qaraı jańartylatyn qýat kózderiniń úlesin 15 paıyzǵa jetkizý jónindegi mindettemesin joǵary baǵalap, Qazaqstandy Jahandyq metan kepiline qosylýǵa shaqyrdy. Taraptar Glazgoda bolyp ótken BUU-nyń Klımattyń ózgerýi jónindegi konferensııasy (COP26) aıasynda Qazaqstan men Ortalyq Azııanyń basqa da memleketteriniń qaıta jańartylǵan mindettemelerin eskere otyryp, C5+1 aıasynda klımatqa beıimdelý, onyń teris saldaryn azaıtý men jasyl ekonomıkany damytý boıynsha odan ári yntymaqtastyqtyń mańyzdylyǵyn atap ótti.

Memlekettik hatshynyń kómekshisi D.Lý AQSh-tyń COVID-19 indetine qarsy turýdaǵy Qazaqstannyń kúsh-jigerine qosqan kómegin atap ótti. Delegasııalar akademııalyq jáne ǵylymı almasýlar arqyly eki el arasyndaǵy baılanysty nyǵaıtýǵa ózara múddeli ekendikterin rastady. Eki tarap sheshim qabyldaý úderisterinde áıelderdiń ókildigin arttyrý boıynsha kúsh-jigerlerdi qoldaýdy jalǵastyrýǵa múddeli ekendikterin bildirdi.

Eki tarap Ortalyq Azııa men Aýǵanstanda birlesken jobalardy júzege asyrý úshin KazAID pen USAID arasyndaǵy tyǵyz yntymaqtastyqty jalǵastyrýǵa múddelilik tanytty. Ádilet vıse-mınıstri Aqerke Ahmetova men Memlekettik hatshynyń demokratııa, adam quqyqtary jáne eńbek jónindegi kómekshisiniń orynbasary Kara Makdonald dinı senim nemese senim bostandyǵyn qoldaý, adam saýdasymen kúresý, azaptaýlardy joıý, bosqyndardy qorǵaý, áıelder quqyqtaryn qorǵaý, áıelderdiń ekonomıkalyq qaýipsizdigin ilgeriletý jáne táýelsiz BAQ pen azamattyq qoǵamdy qoldaý boıynsha yntymaqtastyqty odan ári keńeıtýge múddeli ekendikterin bildirdi.

Syrtqy ister mınıstriniń orynbasary A.Rahmetýllın men Memlekettik hatshynyń kómekshisi D.Lý Keńeıtilgen strategııalyq seriktestik jónindegi komıssııanyń kelesi otyrysyn 2022 jyly Vashıngtonda ótkizýge nıet bildirdi. Sonymen qatar, olar Premer-Mınıstriniń orynbasary - Syrtqy ister mınıstri M.Tileýberdiniń Vashıngtonǵa saparyn 2022 jyldyń birinshi jartysynda uıymdastyrý máselesin talqylady.

Sońǵy jańalyqtar

Elordada Ulttyq Onim kórmesi ashyldy

Elorda • Búgin, 16:52

Dollar 425 teńgeni qurady

Qarjy • Búgin, 16:33

Aqtóbede jol apatynan eki adam qaza tapty

Aımaqtar • Búgin, 13:35

Uqsas jańalyqtar