Kezinde maestronyń esimi elimizge ǵana emes, shet memleketterge de tanymal bolyp, ony tyńdaýshylary ǵajaıyp daýysy úshin «Barıtondar koroli» (D.Gnatıýk) dep atady. Tipti, áıgili ánshi Músilim Magomaev ony «Keńes Odaǵyndaǵy úzdik Fıgaro» dep qadir tutty, sebebi osy partııamen Ermek aǵamyz sol kezdegi odaqtas respýblıkalarda ǵana emes, Eýropa elderinde óner kórsetip, dúıim jurtty tánti etti.
Ol P.Chaıkovskıı atyndaǵy Almaty mýzykalyq ýchılıshesi men Qurmanǵazy atyndaǵy Qazaq ulttyq konservatorııasyn támamdaǵan soń, Máskeýdegi Úlken teatrǵa qyzmetke shaqyrý alǵanyna qaramastan, týǵan elinde qalyp, ulttyq án óneriniń damýyna qomaqty úles qosty. Operalyq, kameralyq jáne estradalyq baı repertýarymen kóptegen elge gastroldik saparmen baryp, qazaq óneriniń abyroıyn asqaqtatty. Sondaı-aq ulttyq kınomyzdyń altyn qoryna engen «Bizdiń súıikti dáriger», «Taqııaly perishte» kórkem fılmderinde este qalarlyq rólderdi oınap, ónegeli izin qaldyrdy.
Ǵajaıyp kesh Ermek Serkebaev týraly beınefılmmen bastalyp, talantty dırıjer Abzal Muhıtdınniń jetekshiligimen «Astana Opera» sımfonııalyq orkestri A.Serkebaevtyń «Tomırıs» operasynan «Qasqyr» kúıin tartý etse, Qazaqstannyń eńbek sińirgen qaıratkerleri Talǵat Musabaev, Janat Shybyqbaev, Medet Chotabaev, Azamat Jyltyrkózov, Meıir Baınesh, Jupar Ǵabdýllına, Bıbigúl Januzaq, Margarıta Dvoreskaıa jáne Tatıana Vısınskaıa, Evgenıı Chaınıkov, Rasýl Jarmaǵambetov, Shyńǵys Rasylhan, Ramzat Balakıshıev, Saıan Isın, Gúldana Aldadosova sekildi belgili solıster óz ónerlerimen jurtshylyqtyń yqylasyna bólendi. Sonymen birge Qazaqstannyń eńbek sińirgen qaıratkeri Erjan Dáýitovtiń jetekshiligimen «Astana Opera» horynyń oryndaýynda úzdik operalyq jáne aspaptyq shyǵarmalar usynyldy.
Kesh sońynda «Astana Operanyń» barlyq solısteri, hory jáne sımfonııalyq orkestriniń qatysýymen «Bizdiń súıikti dáriger» kınofılminde Ermek Serkebaev aǵamyz shyrqaǵan kompozıtor Aleksandr Zasepınniń «Nado mnoı nebo sınee...» atty tamasha týyndysy oryndaldy.
