Bilim jáne ǵylym mınıstri Ashat Aımaǵambetovtiń tapsyrmasy boıynsha Ulttyq testileý ortalyǵy erekshe qajettilikteri bar talapkerler UBT-ny neǵurlym qolaıly jaǵdaılarda ótýi úshin birqatar sharalar qabyldaıtyn bolady.
Osylaısha, kelesi jyly kórý, estý, tirek-qımyl apparatynyń fýnksııalary buzylǵan oqýǵa túsýshiler negizgi 240 mınýttan basqa, testileý tapsyrmalaryn oryndaý úshin taǵy 40 mınýt alady. Iаǵnı, olar UBT-ny basqalarǵa qaraǵanda uzaǵyraq: 4 saǵat 40 mınýt ishinde tapsyra alady.
«Biz úshin jumystaǵy eń basty baǵdar - talapkerlerdiń múddeleri. Biz qazirdiń ózinde UBT-ny jylyna birneshe ret ótkizip jatyrmyz jáne talapkerlerdiń, onyń ishinde erekshe bilim berý qajettilikteri bar talapkerlerdiń testileýdi yńǵaıly tapsyrýy úshin jaǵdaı jasaýdy jalǵastyrýdamyz. Olar úshin UBT tapsyrý ýaqyty taǵy 40 mınýtqa uzartylady», dedi QR BǴM Ulttyq testileý ortalyǵynyń dırektory Rýslan Emelbaev.
Onyń aıtýynsha, erekshe qajettilikteri bar talapkerlerge arnalǵan tapsyrmalardyń mazmunyna da ózgerister engiziledi.
«Olar úshin syzbalarsyz, dıagrammalarsyz test nusqalary jasaldy. Buǵan deıin bizge Bilim jáne ǵylym mınıstri Ashat Aımaǵambetov osyndaı tapsyrma bergen bolatyn. Bul ózgerister olar úshin UBT-dan ótýdi aıtarlyqtaı jeńildetedi», dep qosty Rýslan Emelbaev.
Bilim mınıstrliginiń habarlaýynsha, 2022 jyly UBT «1 kompıýter – 2 kamera – 1 testilenýshi» qaǵıdaty boıynsha ótkiziledi.
«Jumys ornynda negizgi kameradan basqa, testilenýshiniń dybysyn jáne qımyldaryn jazý úshin qosymsha aldyńǵy veb-kamera ornatylady. Frontaldy veb-kamera oqýǵa túsýshiniń jeke basyn sáıkestendirýge jáne UBT kezinde adamdardyń aýystyrylýyn boldyrmaýǵa múmkindik beredi. Sondaı-aq bul emtıhan tapsyrý barysyna baqylaý júrgizý jáne testileýdiń ashyqtyǵyn qamtamasyz etý úshin qajet», deıdi QR BǴM baspasóz qyzmeti.
Vedomstvoda UBT-2022 aıaqtalǵannan keıin kúntizbelik jyldyń sońyna deıin beınejazbalarǵa taldaý júrgiziletinin túsindirdi.
«Tyıym salynǵan zattardy paıdalaný nemese basqa da buzýshylyqtar faktileri anyqtalǵan jaǵdaıda, oqýǵa túsýshiniń UBT nátıjeleri joıylady», dep qosty vedomstvonyń aspasóz qyzmeti.
