Nesıeleý baǵdarlamalarynyń bıýdjeti osy jyly 47,3 mlrd teńgeni qurady. Bul kórsetkish ótken jylmen salystyrǵanda 49 paıyzǵa artyq (2020 jyly – 31,8 mlrd teńge), onyń ishinde jergilikti bıýdjet qarajaty – 28,9 mlrd teńgeni quraıdy. Al respýblıkalyq bıýdjetten bólingen qarajat – 18,4 mlrd teńge. Bıýdjettiń 58 paıyzy sýbsıdııalaý jáne kepildik berý quraldaryna, al 42 paıyzy nesıe berýge jumsalǵan. Bıznesti qoldaýdyń memlekettik jáne óńirlik baǵdarlamalary aıasynda 3 212 joba qarjylandyrylyp, 278,4 mlrd teńge jumsalǵan.
Almaty qalasy ákiminiń orynbasary Maqsat Qıqymov atap ótkendeı, qala bıznesi memlekettik qoldaýdyń barlyq sharasyn belsendi qoldanyp keledi. Máselen, 2018-2019 jyldary negizinen iri jáne orta kásiporyndar qarjylandyrylsa, byltyrdan bastap mıkro jáne shaǵyn bıznesti qoldaý men qarjylandyrý boıynsha kórsetkish jaqsarǵan. Sanattar boıynsha bıyl barlyq jobanyń jartysynan astamyn shaǵyn bıznes quraıdy. Salalar bólinisinde negizgi úles ónerkásipke jáne kólikke tıesili. Aýdandar boıynsha qarjylandyrylǵan jobalardyń eń kóbi megapolıstiń Áýezov, Almaly, Bostandyq jáne Alataý aýdandarynda ornalasqan.
«BJK–2025» baǵdarlamasyna oraı osy jyly 2 815 joba qarjylandyrylyp, 184,6 mlrd teńge nesıe somasy ıgerilgen. Onyń ishinde 231 jobaǵa bólingen qaıtarymsyz ınnovasııalyq granttyń jalpy somasy – 690 mln teńge. «BJK-2025» boıynsha jobalardyń eń kóp sany kelesi salalarda qarjylandyryldy: kólik jáne qoıma – 19,1, saýda jáne qyzmetter – 18,9, ónerkásip – 14,3 paıyz.
Memlekettik baǵdarlamalar aıasynda «Qarapaıym zattar ekonomıkasy» boıynsha 41,7 mlrd teńge nesıe somasyna – 28 joba, «AО́K» boıynsha 36,2 mlrd teńge somasyna – 15 joba, «Eńbek» boıynsha 1,5 mlrd teńgege 102 joba qarjylandyryldy. О́ńirlik baǵdarlamalar aıasynda Almaty Business boıynsha 8,9 mlrd teńgege – 119 joba, Almaty Business – 2025 boıynsha 5,5 mlrd teńgege 133 joba qarjylandyryldy.
Qala shetindegi bıznesti qoldaý da mańyzdy baǵyttardyń biri. Baǵdarlama iskerlik belsendiligi tómen aýdandarda tanymal bola bastady. Oǵan qalanyń 5 aýdany (Alataý, Áýezov, Jetisý, Naýryzbaı, Túrksib) kiredi. Búginde atalǵan aýdandarda 3,3 mlrd teńgeden astam somaǵa 74 joba qarjylandyrylǵan.
ALMATY
