Jetistiktiń jolyn eńbeksúıgishtik ashatynyn anasy Tursynaı Jantaǵulova ósıet etip aıtyp qana qoımaı, sanasyna ábden sińirgendikten bolar taldyqorǵandyq kásipker kelinshek Rımma Salyqova qandaı jumys bastasa da et júreginen ótkizip, berile isteýge ádettengen. Bul ekiniń biriniń mańdaıyna jazylmaǵan hám qolynan kele bermeıtin oń qadam.
Iá, Rımma Salyqova basqaratyn «Almaty boıaýlary» JShS búginde Qazaqstan Respýblıkasy aýmaǵynda keńinen tanylǵan fırma. Zaýyt 2013 jyly 1200 tonna alýan túrli jyltyr boıaý materıaldaryn shyǵardy. Onyń qatarynda kúrejol erejesine saı eskertý, tyıym salý belgilerin boıaıtyn «AK-500» emaliniń 600 tonnasy, jol belgisin bederlep aıqyndaıtyn «TR-AK» termaplastıktiń 400 tonnasy jáne 200 tonna qurylys, 300 tonnadan astam qashyqtyqtan jaltyrap kórinetin áınek ispetti jol belgileriniń boıaýlary bar. Mine, osy materıaldar bul kúnderi elimizde úlken suranysqa ıe bolyp otyr. Aǵymdaǵy jyly sol úrdis ózindik jalǵasyn tabýy úshin zaýytta talapqa saı qondyrǵylar ornatylyp, túrli kólemdegi tapsyrystardy óteý jalǵasýda. Bul materıaldardyń bári zaýyt zerthanasynda tekserilip, tájirıbeden ótkizilip baryp rynokqa shyǵarylýda. Sondaı-aq, aýa raıynyń qubylystaryna tótep bere alatyn, ıaǵnı óship qalmaıtyn tózimdi hám sapaly ónimderdi molynan shyǵarý úshin qýattylyǵy 5000 tonna «LKM» jáne 6000 tonna termoplastık ornatylǵan. Taǵy bir aıta keter jaıt, bul óndiris orny «Jol kartasy-2020» memlekettik baǵdarlamasyna engen. Turǵylyqty halyqtan quralǵan qatardaǵy jumyskerler men mamandardyń bilmegenin úıretip, tájirıbe almasyp, sanattaryn ósirý úshin sheteldik mamandar da zaýytqa tartylǵan. Nátıjesinde jergilikti mamandar jyltyr boıaýdyń qaı túrin bolsyn shyǵarýdy meńgerip alǵan. Zaýytta 7 adamnan quralǵan 5 túrli tehnıkalary bar eki brıgada jasaqtalyp, jumys isteýde.
«Elimizde otandyq ónim óndirýshilerge ishki jalpy ónimniń enshisin 50 paıyzǵa jetkizý úshin birqatar talap qoıylǵany málim. Bul mindetten shaǵyn jáne orta bıznes ókilderi de shet qalmaıtyny belgili. Sondyqtan men basqaratyn «Almaty boıaýlary» JShS otbasylyq bıznestiń de tıimdiligin dáleldep, ónimin arttyrýda. Búginde bul kompanııada 65 adam jumys isteıdi. Jeke áleýmettik baǵdarlamamyzdy júzege asyrýdamyz. Qatardaǵy jáne asa iri bızneste otbasylyq múdde úshin birlese atqaratyn jumysty júzege asyrý dástúrge aınalǵan. Mysaly, meniń balalarym Mádı men Sáken alýan túrli jyltyr materıaldardy, onyń ishinde avtokólik joldaryndaǵy belgilerge qajet boıaýlardy óndirý boıynsha áriptesime aınaldy. Sonymen qatar, Sáken sambo boıynsha respýblıkalyq federasııanyń prezıdenti», dedi kásipker kelinshek Rımma Salyqova aǵynan jarylyp. Budan túıgenimiz: «Uıada ne kórseń ushqanda sony ilesiń» degen qazaqy danalyq boldy.
«Almaty boıaýlary» JShS-niń barlyq ónimderi qajetti CT-KZ sertıfıkatyn alǵan. Zaýyttyń óndiristik qýattylyǵy jylyna 20000 tonna boıaý shyǵarý. Jalpy, ST RK ISO 9001-2009 talabyna sáıkes keledi. Úsh jyldan beri úzilissiz jumys istep kele jatqan kásiporyn jyl saıyn 1000 tonna ónimderin eksportqa shyǵarady. 2001 jyly Reseı Federasııasynda qurylǵan fılıaly «Almaty boıaýlary» ónimderin Shyǵys Sibir, Habarov jáne Altaı ólkelerine taratady. Astana qalasyndaǵy fılıal qarqyny da jaman emes.
Qoryta aıtqanda, árqandaı istiń kózin taýyp, júrek qalaýymen tańdaǵan jumysyńyzdy berile istep, jetistikke jetý bir baqyt qoı. Sol jetistik oryndy baǵasyn alyp jatsa qandaı ǵanıbet. Áıel áleminiń bir artyqshylyǵy árqashan uqyptylyǵymen, tabandylyǵymen, tııanaqtylyǵymen, bar yntasymen erteńgi eńbektiń negizin búgin qalaı alatyndyǵynda, naqtylaı tússek ekiniń biri eskere bermeıtin jumystyń kózin taýyp, sodan oń nátıje shyǵarýynda jatyr. Taldyqorǵandyq kásipker kelinshek Rımma Salyqovanyń qadamy sonyń bir dáleli dep bilemiz.
Nurbol Áldibaev,
«Egemen Qazaqstan».
Almaty oblysy.
