Balalar jylyna oraı Ulttyq akademııalyq kitaphanada «Máńgilik el qundylyqtary. Ardaq tutar alyptary», «Meniń súıikti kitaptarym» atty kitap kórmeleri ashyldy.
Is-shara ulttyq qundylyqtardy jańǵyrtý, dáripteý, el rýhanııatyn kótergen tulǵalardyń taǵylymdy shyǵarmashylyǵymen tanystyrý jáne «2022 – Balalar jylyna» oraı balalarǵa arnalǵan ádebıetterdi nasıhattaý maqsatynda uıymdastyrylyp otyr.
Kórmede IýNESKO-nyń mereıtoılar tizimine engen Ahmet Baıtursynulynyń týǵanyna 150 jyl, Roza Baǵlanovanyń týǵanyna 100 jyl, Muhtar Áýezovtiń týǵanyna 125 jyl, Ǵabıt Músirepov pen Ǵabıden Mustafınniń týǵanyna 120 jyl, Kúlásh Baıseıitovanyń týǵanyna 110 jyl, sonymen qatar Nur-Sultan qalasynyń qurylǵanyna 25 jyl men kóptegen zııaly qaýym ókilderi men qoǵam qaıratkerleriniń qazaq ádebıeti tarıhyna qosqan eńbekteri nasıhattaldy.
Máselen, «Máńgilik el qundylyqtary. Ardaq tutar alyptary» atty kitap kórmesi birneshe bólimnen quralǵan. «Rámizder – eldigimizdiń eńsesi, teńdigimizdiń tiregi» atty bólimde Memlekettik rámizder – Eltańba, Tý men Gımnniń qabyldanǵanyna 30 jyl jáne «El júregi – elorda» atty bólimde elorda Nur-Sultan qalasyna 25 jyl tolý mereıtoılaryna oraı memlekettik nyshandar men elorda tarıhy týraly ádebıetter men eńbekter qoıyldy.
Al «Ulttyń uly ustazy» atty bólimde ádebıet zertteýshi ǵalym Ahmet Baıtursynulynyń 150 jyldyq mereıtoıyna oraı el úshin aıanbaı atqarǵan qyzmetteri men eńbekteri jaıynda derekter beriledi. Sondaı-aq «Qazaq ádebıetiniń alyptary» atty bólimde keńestik dáýirde qazaq ádebıetiniń altyn ǵasyryn qalyptastyrýda aýqymdy proza janryn damytqan ádebıet alyptary Muhtar Áýezovtiń 125, Ǵabıt Músirepov pen Ǵabıden Mustafınniń 120 jyldyq mereıtoılaryna oraı tyń derekter men shyǵarmalary jaıynda aqparattar quraıdy. Budan bólek taǵy birneshe bólim bar.
Kitap kórmesi barysynda 2022 – TMD halyq shyǵarmashylyǵy jáne mádenı mura jyly dep jarııalanýyna oraı on bir memlekettiń mádenıetin, tarıhyn, dástúrin dáripteıtin ádebıetter usynyldy.
Is-sharaǵa zııaly qaýym ókilderi men jýrnalıster qatysty.
