Zeınetaqysynyń kólemi 100 teńge quraıtyn qarııa Shymkentte turady

Ońtústik Qazaqstanda 100 teńge alatyn zeınetker bar. Osy oblystaǵy Ordabasy aýdany, Shubarsý saıajaıynda turatyn jalǵyzbasty ataıdyń izdeýshisi joq. Al jergilikti atqaminerler onyń bul múshkil halinen beıhabar bolyp shyqty. Bul týraly Otyrar.kz habarlady. Saıttyń tanystyrýynsha, eki bólke nanǵa ǵana jetetin puldy zeınetaqy retinde alatyn qarııanyń atyn-jóni Vasılıı Lıovochkın eken. Qazir jasy 83-ke kelgen qart sońǵy 10 jyldan beri Shubarsýdaǵy aýzy-murny joq lashyqty meken etedi. Isherge tamaǵy, kıerge kıimi joq. Se­bebi, alatyn járdeminiń túri álgindeı. Bálkim, muny bireýler qarttyqtyń kelip, ataıdyń esepten jańylǵanyna sanar. Joq, tipti de olaı emes eken. Joq­­shylyqtyń qamytyn kıgen Va­sı­lıı Alekseevıch qudaıy kórshisi Ahmet Úsenovtiń 45 myń teńge zeınetaqy alatynyn bilip otyr. Alaıda, aqshany egde kisi emes, Ahmettiń  ózi ustaıdy. Aıtýynsha, saıajaı turǵyndarynyń ótinishimen qartty qaraýyna alǵan. Kómek qolyn sozyp, tamaqtandyryp, shomyldyryp turatyn kórinedi. «Degenmen, Vasılıı ataı toq adamǵa uqsamaıdy. Bizge úsh kúnnen beri eshteńe jemegenin aıtty. Arqalaı barǵan nanymyzdy qomaǵaılanyp jep aldy. Al jergilikti bılik jalǵyzilikti jannyń jaǵdaıynan beıhabar. Mamandar «Bul atany alǵash kórdik, jaǵdaıy týraly endi estidik», deıdi. Aldaǵy kúnderi arnaıy komıssııa quryp, tekseremiz dep otyr», – degendi alǵa tartady tilshiler. Al Ordabasy aýdandyq ákimdiginiń áleýmettik qyzmet boıynsha bas mamany Ánýar Tursynbaev: «Komıssııa quramyz, tekseremiz. Aýdanǵa, oblysqa hatpen shyǵatyn bolamyz. Eger memleket tarapynan kómek bolsa, kórsetemiz», – deıdi. Zeınetaqysyn túgendemek túgili, isherge as-aýqat tappaı otyrǵan Va­sılıı Aleksevıch Shymkent qalasynda tirkeýde turady. Biraq kóshede qalǵan qarııa qujattarynyń qaıda ekenin de bilmeıdi. Qarttar úıine óz aıaǵymen bara da almaıdy. Sol úshin áleýmettik bólimniń kómegine zárý. Sáken MAILYBAI.