Elordadaǵy Beıbitshilik jáne kelisim saraıynda Túrik Respýblıkasynyń memlekettik «Halyq bıi» ansambli kórermenderge konserttik baǵdarlama usyndy.
Naýryz meıramynyń lebi sezile bastaǵandaı. Baýyrlas túrik halqy merekege oraı eki el arasyndaǵy mádenı baılanysty nyǵaıtý maqsatynda Túrkııadaǵy eń bir tanymal shyǵarmashylyq ujymnyń konsertin astanalyqtarǵa usyndy. Ony elimizdegi Túrkııa elshiligi men Júnis Emre atyndaǵy túrik mádenıet ortalyǵy uıymdastyrdy.
Konsert aldynda kórermenderge jyly lebizin arnaǵan Júnis Emre atyndaǵy Túrik mádenıet ortalyǵynyń dırektory Ibrahım Iyldyrym merekeler ár ulttyń turmys-tirshiliginde mańyzdy oryn alatynyn, birlik, baýyrmaldyq sezimderin jandandyratyn mańyzdy kún ekenin atap ótti. «Naýryz merekesi tek qana qazaq pen túrik halyqtary úshin ǵana emes, barlyq túrik tektes týystas halyqtar úshin de mańyzdy sanalady. Biz bul is-sharany uıymdastyrýda túrik álemi túsinigin nyǵaıtýdy, eki el arasyndaǵy syılastyqty mádenıetpen dánekerleýdi maqsat ettik», dedi ol.
Saltanatty kesh dástúrli ánshi Zaǵıpa Imanǵazıevanyń oryndaýyndaǵy «Kyzyl chyklar» atty túrik jurtynyń belgili óner týyndysymen bastaldy. Sosyn álemniń eń úlken sahnalarynda óner kórsetip júrgen «Halyq bıi» ansambli Túrkııanyń ártúrli aımaqtaryna tán ulttyq shyǵarmalardy, sondaı-aq, «Chıftetellı», «Halaı», «Býrdýr», «Karadenız», «Zeıbek» atty bılerdi kórermen nazaryna birinen keıin birin usyndy.
Aıgúl SEIILOVA,
«Egemen Qazaqstan».
________________________________
Sýretterdi túsirgen Erlan OMAROV.
