Bilim jáne ǵylym mınıstrligi Prezıdenttiń tapsyrmasy boıynsha qoldaý sharalarynyń tıisti paketimen atalǵan óńirlerge úzdik pedagogterdi tartý jóninde arnaıy baǵdarlama ázirlep jatyr.
«Pedagogterdiń osy salalarda jumys isteýine múddeli bolýy úshin biz jalaqynyń arttyrý koeffısıentin belgileý, turǵyn úı berý nemese turǵyn úıdi jalǵa alý qunyn óteý, kommýnaldyq qyzmetterdi tóleý ótemaqysy jáne t.b. osy sııaqty áleýmettik qoldaý sharalaryn usynamyz.
Mundaı áleýmettik paket arnaıy rásimnen ótip, belgili bir ólshemderge sáıkes keletin jáne belgili bir mektepterge jumysqa aýysatyn muǵalimderge beriledi. Naqty iske asyratyn keıbir tetikterin áli de talqylyıtyn bolamyz», dep jazdy Bilim mınıstri áleýmettik jelide.
Sondaı-aq taǵy bir baǵyt boıynsha Qazaqstanda sheteldik 5 JOO fılıaldaryn ashylady. Bul shara otandyq ýnıversıtetter arasynda básekelestikti arttyrýǵa múmkindik berýi múmkin. Mınıstr osy baǵyttaǵy jumysqa kirisip ketkenderin de jetkizdi.
«2021 jyldyń qyrkúıeginde De Montfort Lester Brıtan ýnıversıtetiniń (De Montfort University Leicester) fılıaly ashyldy.
Sonymen qatar, Qozybaev atyndaǵy ýnıversıtetti Arızona ýnıversıtetine senimgerlik basqarýǵa berý máselesi pysyqtalýda.
Elimizdiń batys óńirlerindegi jastardyń joǵary bilimge qol jetkizýin arttyrý úshin onda eki jetekshi sheteldik tehnıkalyq ýnıversıtettiń fılıaldary ashylatyn bolady.
Sondaı-aq Prezıdenttiń tapsyrmasyna sáıkes Reseıdiń úzdik tehnıkalyq ýnıversıtetiniń fılıalyn ashý boıynsha jumystar júrgizilýde», dedi ol.
Onyń aıtýynsha, basqa da álemdik deńgeıdegi ýnıversıtetterdiń fılıaldaryn ashý boıynsha jumys júrgizilip jatyr.
