Uzaq ýaqyt boıy halyqaralyq arenada Qazaqstannyń týy astynda óner kórsetken jáne kórsetip júrgen tennısshilerdiń deni Reseı týmalary ekeni barshaǵa málim. Solardyń arasynan Iаroslava Shvedovany bóle-jara ataýǵa bolady. 34 jastaǵy Máskeýdiń týmasy kezinde Rolan Garros (2010, 2012) pen Ýımbldonnyń (2016) shırek fınalyna deıin jetti. Osy tabysynyń arqasynda 2012 jyly WTA reıtınginde 25-orynǵa kóterildi. Elena Rybakına qarqynyn kúsheıtkenge deıin qazaqstandyq tennısshiler arasyndaǵy eń úzdik nátıje osy edi. Odan bólek, juptyq saıysta Shvedova Ýımbldon (2016) men AQSh-tyń ashyq birinshiliginiń (2010) bas júldesin oljalap, Rolan Garrostyń (2015) fınalynda oınady. Bul rekordtardyń kúni búginge deıin murty buzylmaı tur.
2017 jyly náresteli bolǵan Iаroslava biraz ýaqyt súıikti isinen qol úzip qaldy. Biraz ýaqyt balasyn baqty, sonymen qosa eski jaraqattaryn emdedi. Arada úsh jyl ótken soń kortqa qaıta oraldy. Biraq ol burynǵy babyna qaıta kele almady. Ortańqol jarystardyń ózinde jeńiske jetý oǵan ońaıǵa soqpady. Sodan Shvedova byltyrǵy jyldyń sońynda karerasyn aıaqtaıtyny jaıynda resmı túrde málimdedi.
Sporttyq mansabyn aıaqtaǵandar arasynda Sesıl Karatancheva men Galına Voskoboeva óz zamanynda táýir oınady. Olardyń biri Bolgarııadan kelse, ekinshisi Reseıden qonys aýdardy. Jalyndap turǵan shaǵyndaǵy Karatanchevanyń eń úzdik kórsetkishi – 35-oryn (2005), Voskoboevanyń jetken mejesi – 42-saty (2012).
Bul kúnderi óner kórsetip júrgen qyzdardyń arasynan Iýlııa Pýtınseva men Zarına Dıas ara-tura eleýli tabystarǵa qol jetkizip júr. Qazirgi kezde úzdikter tiziminde 42-orynǵa taban tiregen Pýtınseva 2017 jyly 27-satyǵa deıin kóterildi. Onyń «Úlken dýlyǵa» sanatyndaǵy týrnırlerdegi nátıjeleri de jaman emes. Máskeýdiń týmasy Rolan Garrostyń eki ret (2016, 2018) jáne AQSh-tyń ashyq birinshiliginiń bir márte (2020) shırek fınalynda kúsh synasty. Ozyq 100 oıynshynyń tizimin mańaılap júrgen Dıas bir kezderi 31-oryndy enshilegen edi. Ol Ýımbldon jarysynyń tórt ret (2014, 2015, 2020, 2021) tórtinshi kezeńine deıin jetkenin jankúıerler umyta qoıǵan joq.
Erler arasynda birer jyl Andreı Golýbev pen Mıhaıl Kýkýshkın óz kórermenderin qýantyp keldi. Alǵashqysy 2010 jyly ATR tiziminde 33-satyǵa taban tirese, ekinshisi 2019 jyly 39-oryndy ıelendi. Salystyrmaly túrde alsaq, «Úlken dýlyǵa» dodalarynda Golýbevke qaraǵanda Kýkýshkınniń kórsetkishi jaqsyraq boldy. Mıhaıl Aýstralııanyń ashyq birinshiligi (2019) men Ýımbldonnyń (2019) tórtinshi kezeńine deıin jetti. Al Andreı eshýaqytta atalǵan jarystardyń ekinshi aınalymynan aspaǵan. Soǵan qaramastan, Devıs kýbogynda Qazaqstan quramasynyń myqtylar sanatyna qosylýyna qos jerlesimiz súbeli úles qosqanyn eshkim joqqa shyǵara almaıdy.
Dál qazirgi kezde 24 jastaǵy Aleksandr Býblıktiń qarqyny qýantady. Neva jaǵalaýynan kelgen sportshynyń Qazaqstannyń azamattyǵyn alǵanyna alty jylǵa jýyqtady. Áli býyny bekı qoımaǵan bozbalanyń myqty tennısshi bolyp qalyptasýyna bizdiń elde barlyq jaǵdaı jasaldy. Nátıje kóp kúttirgen joq. Búgingi tańda Býblıkpen saqa sportshylardyń ózderi sanasady. Byltyr kúzde ol ATR reıtınginde 34-orynǵa deıin kóterildi. Al qazir Aleksandr sol bıiginen nebári úsh saty ǵana tómendedi.
Qazaqstan tennısi jaıynda áńgime qozǵaǵanda, Elena Lıhovsevaǵa toqtalmaı ketýge bolmaıdy. 1975 jyly Almatyda týyp-ósken otandasymyz 1999 jyly álemdik reıtıngte 15-orynǵa jaıǵasty. Kezinde ol Rolan Garrostyń jartylaı (2005) jáne Aýstralııanyń ashyq birinshiligi (2000) men Ýımbldonnyń (2002) shırek fınaldarynda oınady. Biraq bul jetistikteriniń barlyǵyna Lıhovseva Reseıdiń sapynda óner kórsetken ýaqytta qol jetkizdi. Sondyqtan da atalǵan oıynshynyń tabystary Qazaqstanǵa tıesili emes.
Al búgingi tańda óreli ónerimen kózge túsip júrgen Elena Rybakınaǵa keler bolsaq, ol 1999 jyly Máskeýde týdy. Jergilikti federasııa tarapynan kóńildegideı qoldaý tappaǵannan keıin 2018 jyly Qazaqstanǵa qonys aýdardy. Sol kezden beri onyń sporttyq karerasynda órleý kezeńi bastaldy. Álemdik reıtıngte 191-orynda turǵan Rybakınanyń kórsetkishi ýaqyt ozǵan saıyn jaqsara tústi. Byltyr ol Melbýrndegi jarystyń úshinshi kezeńine shyqsa, bıyl Ýımbldonnyń tórtinshi aınalymyna jetip, Rolan Garrostyń shırek fınalynda sheberlik baıqasty. WTA týrnırlerin eki ret utty. Byltyr Tokıo Olımpıadasynda tórtinshi orynǵa taban tiredi. Sonyń arqasynda Elena búgingi tańda álemniń 13-raketkasy atanyp otyr. Taǵy da qaıtalap aıtamyz, bul – ázirge qazaqstandyq tennısshiler arasyndaǵy eń zor kórsetkish!
