О́ner • 14 Qańtar, 2022

Halyq ómiriniń panoramasyn jasaǵan sýretshi

Eger keskindeme men grafıka óneri týraly aıtar bolsaq, onda Qazaqstandaǵy sýret óneriniń kásibı mektebi HH ǵasyrdyń 20-shy jyldary quryldy, al onyń qaınar bastaýynda Qazaqstannyń halyq sýretshisi Ábilhan Qasteev turady. Búgin Qazaqstannyń Halyq sýretshisiniń týǵan kúni, dep jazady Egemen.kz

Arman MANARBEKULY

Sýretshi adam janyn, onyń shattyǵy men muńyn, qýanyshy men súıinishin, ishki oı arpalysyn tereńnen túsine bilgen jáne aınaladaǵy tabıǵat qubylystarymen adam kóńil-kúıin shendestire otyryp, óz shyǵarmalary arqyly solardy kópshilikke sheber jetkize biledi.

"Men sýret salýdy taýdyń bulaǵynan, qoıdyń qulaǵynan, eshkiniń múıizinen, anamnyń oıýynan úırendim"

Ábilhan Qasteev

Á.Qasteev — qazaq mádenıetiniń tanym tarıhy. Ol — rýhanı tarıhtyń quramyndaǵy ózinshe jeke ózek sekildi. Ol — óz dáýirindegi ózine ǵana tán jolmen, ózine ǵana tán dara ónermen qazaq mádenıetin jańa kezeńge kótergen has sheber. Sheberdiń óneri ortaq bolǵanymen, syry qupııa.

Uly sýretkerdiń árbir shyǵarmasy – bir álem. Sýretshi Á.Qasteev halyq ómiriniń panoramasyn beıneleıtin tarıhı shyǵarmalarynyń birtýar talanty.

Onyń qalamynan týǵan tarıhı adamdardyń jıvopıstik portretteri nemese Túrkisib temir jolyna qatysty, Jetisý tabıǵatynyń eń bir sulý kórkem jerleriniń sýretteri adamǵa estetıkalyq áser berýmen qatar, tarıhyn da kórkemdikpen kórkeıtip jatady.

Á.Qasteev kóshpendilerdiń ómirin ǵajap kesteleı bilgen. Osy oraıda ásirese tórt túlik beınelerin óz yrǵaǵymen, túrsıpatymen ásem kelistirdi. Á.Qasteev keremeti – halyqtyǵynda, ómirsheńdiginde, jasampazdyǵynda.

Qazaq ónerine eńbegi sińgen Ábilhan Qasteev uzaqqa sozylǵan aýyr naýqastan keıin 1973 jyly 2 qarashada qaıtys bolady. Onyń joǵary ıdeıalyqqa, tereń halyqtyq jáne ómir shyndyǵyna toly óneri halyqqa keńinen tanylyp, súıispenshilikke bólendi.

Á.Qasteev – búgingi tańda da bizdiń zamandasymyz. Búkil jan-tánimen árqashan halyqpen birge bolǵan ol onyń eń tańdaýly qadir-qasıetin boıyna sińirip, sol arqyly bolmys pen ýaqyt shyndyǵyn zamandastary men keler urpaqqa baıandap berdi. Halyqpen osy etene jaqyndyǵynyń nátıjesinde onyń ómiri men óneri máńgi jasarǵan kúıi kóz aldymyzda tura bermek.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz