Temirden túıin túıgen Aına Kenesarına týraly az-kem áńgime
Qazirgi tańda qyz-kelinshekter aralaspaıtyn sala joqqa tán. Tipti, jany názik arýlardyń er-azamattardyń ǵana qolynan keledi degen kásiptiń ózin ádemi ıgerip alǵanyn kórip tánti bolasyń. Solardyń qatarynda «Qazhrom TUK» AQ fılıaly – Aqtóbe ferroqorytpa zaýyty mehanıkalyq jóndeý sehynyń tokary Aına Kenesarınany ataýǵa ábden bolady.
Ol erlerdiń ózi táýekel ete bermeıtin tokarlyq mamandyqqa tóselip alǵany sonshalyq, stanoktyń qulaǵynda oınaıdy dese de bolǵandaı. Onyń osy salada eńbek etip júrgenine segiz jyldyń júzi bolypty.
Bala kúngi armanyn júzege asyrý maqsatynda Hromtaý qalasyndaǵy kásiptik- tehnıkalyq lıseıdiń tokarlar daıarlaıtyn bólimine qujattaryn tapsyrǵanda otbasyndaǵylardyń narazylyq bildirgeni de ras. «Eń bolmasa, tiginshiler daıarlaıtyn bólimine tapsyrsań qaıtedi. Tokarlyq tek er-azamattarǵa tán mamandyq qoı. Qyz bala úshin aýyr kásip emes pe?» deýshiler de tabyldy. Biraq, alǵan betinen qaıtpaıtyn qaısar qyz osy qarsylyqtarǵa qaramastan lıseıdi oıdaǵydaı aıaqtady. Oqý kezinde Dóń ken baıytý kombınatynda tájirıbeden ótti. О́ndiris jaǵdaıyna kóndikti, tokarlyq kásiptiń qyr-syryna qanyqty. Tájirıbeden ótý barysynda-aq ózin jaqsy qyrynan kórsete bilgen Aınany kombınat mamandary ózderine jumysqa shaqyrdy. Ol bul shaqyrýdy qýana qarsy aldy. 2006 jyldan bastap 2012 jylǵa deıin Dóń ken baıytý kombınatynyń mehanıkalyq jóndeý sehynda tokar bolyp abyroıly eńbek etti. 2013 jyldan beri Aqtóbe ferroqorytpa zaýytynda mehanıkalyq jóndeý sehynyń mehanıkalyq jóndeý ýchaskesinde óndiristik eńbek jolyn jalǵastyryp keledi.
Biz on aǵaıyndymyz. Men otbasynda besinshi balamyn. Aǵalarym Nurlan Dóń ken baıytý kombınatynda burǵylaýshy, Baýyrjan «BelAZ» tehnıkasynyń júrgizýshisi bolyp jumys isteıdi. Sondyqtan shyǵar meniń óndiriske jaqyn bolǵandyǵym. Men bala kezimnen shahtıor bolýdy armandaıtynmyn. Mektepte birge oqyǵan qurby-qurdastarymnyń biri dáriger, biri muǵalim bolsam dese men esh oılanbastan tokar bolamyn dep lıseıge qujattarymdy tapsyrdym. Nege ekeni belgisiz, er-azamattardyń isteıtin jumystary meni qatty qyzyqtyratyn. Osy mamandyqty ıgergenime esh ókinbeımin, kerisinshe maqtan tutamyn. Árıne, tokardyń jumysy óte jaýapty, kúrdeli bolyp keledi. Berilgen tapsyrmalardy syzbalar arqyly dálme-dál etip jasap shyǵarý, úzilissiz jumys istep turǵan stanoktyń shýyly, segiz saǵat boıy aıaqpen turý sııaqty ózindik qıyndyqtary da jeterlik. Biraq, kúndelikti óndiriske qajetti buıym jasap shyǵaryp, kópshiliktiń kóńilinen shyǵyp jatqanda bar qıyndyqty umytyp óz kásibińnen lázzat alasyń. Alǵash Aqtóbe ferroqorytpa zaýytyna kelip jumysymdy jalǵastyrǵanda mehanıkalyq jóndeý ýchaskesinde tokar bolyp isteıtin birde-bir áıel adam joq eken. Erlerdiń ortasynda jalǵyz ózim júrgende yńǵaısyzdanǵanym da ras. Qazir úırenip kettim. Ujymdaǵy aǵa býyn ókilderi óz qyzdary sııaqty qurmet kórsetip, qamqor bolyp óndiristegi is-tájirıbelerimen bólisip, aqyl-keńes berip otyrady, deıdi Aına Kenesarına.
Aınanyń eńbeksúıgishtigi, jaýapkershiligi, ustamdylyǵy, tózimdilik sııaqty qasıetteri anasynan darysa kerek. Anasy Gúlsara aýyl sharýashylyǵynda eńbek ete júrip, on balany dúnıege ákelgen Batyr ana. Balalary búginde erjetip bir-bir mamandyqty ıgerip, tabysty eńbek etýde.
Jas ta bolsa óz kásibiniń jemisin kórip, ózine júktelgen mindetterdi buljytpaı oryndaıtyn, erlermen teń ıyq tirestirip kez kelgen óndiristik isti dóńgeletip alyp ketetin Aına bos ýaqytynda salamatty ómir saltyn ustanady, erteli-kesh júgirýmen aınalysady. О́nerden de quralaqan emes, zaýyt kóleminde ótetin seharalyq kórkemónerpazdar baıqaýy, kóńildiler men tapqyrlar klýbynyń saıystary da onsyz ótip kórgen emes.
Satybaldy SÁÝIRBAI,
«Egemen Qazaqstan».
Aqtóbe oblysy.
