Onyń aıtýynsha, qaladaǵy qoǵamdyq tártipti qamtamasyz etýge jáne asa mańyzdy nysandardy qorǵaýǵa 3 800 polısııa men sarbaz jumyldyryldy.
Sonymen qatar, ol Almatyda úsh aýysymdy rejımde polısııa jáne áskerı qyzmetkerlerden qurylǵan jaıaý patrýlder jumys istep jatqanyn aıtty.
«Qalada 5 blok-beket jumys istep tur. Oǵan 390 adam jumyldyrylǵan. Qorǵanys mınıstrligi áskerı qyzmetkerleri qalanyń barlyq mańyzdy strategııalyq nysandaryn qorǵap tur. Polısııa bankterdiń 49 esep aıyrysý bólimshesin kúzetke aldy», dedi ol.
«Terrorızmge qarsy operasııa bastalǵaly ishki ister organdaryna jalpy 2300 adam jetkizildi. Olardyń 236-sy qaraqshy jáne jappaı tártipsizdikke qatysqandar boldy, olar qamaýǵa alyndy. 84 adam komendattyq saǵatty buzǵany úshin ákimshilik jaýapqa tartyldy», dedi Qanat Taımerdenov. Spıkerdiń sózinshe, 7 qarý-jaraq dúkeninen 1 347 qarý urlanǵan. Osyǵan qatysty arnaıy tergeý toby quryldy. Osy sátke deıin 127 qarý tárkilendi, onyń 58-i ańshy dúkeninen urlanǵany anyqtaldy.
