Sport • 17 Qańtar, 2022

Álemdegi eń baı sportshylar

115 ret kórsetildi

Jýyrda áıgili Forbes jýrnaly 2021 jyly materıaldyq turǵydan eń kóp oljaǵa kenelgen sportshylardyń reıtıngin jarııalady. Ádette úzdikter tiziminiń aldyńǵy leginen fýtbolshylar men tennısshilerdi nemese golfshylar men kásipqoı boksshylardy kóretin edik. Bul joly olaı bolmady. Byltyrǵy jyldyń qorytyndysy boıynsha baı-qýattylar kóshin atyshýly ırlandııalyq aralas jekpe-jek sheberi Konor Makgregor bastap tur.

Irlandııanyń astanasy – Dýb­lınniń dál irgesinde or­nalasqan Kramlın qalasynda týyp-ósken Konor qara jumysqa erte jegildi. О́ziniń eńbek jolyn santehnık bolyp bastaǵan ol 20 jastan asqan shaǵynda aralas jekpe-jekke den qoı­dy. О́ziniń tabandylyǵy men jankeshtiliginiń arqasynda eleýli tabystarǵa qol jetkizdi. Arada bes jyl ótken soń álem­degi eń beldi uıym – UFC ma­mandarynyń nazaryna ilikti. Amerıkaǵa kelgen bette Mak­gregor qatarynan jeti jekpe-jekte jeńiske jetip, jartylaı jeńil salmaqta chempıondyq belbeýdi ıelendi. Odan taıaq jegender arasynda Markýs Brı­meıdj, Maks Holloýeı, Dıgeý Brandan, Dastın Pore, Dennıs Zıfer, Ched Mendes jáne Joze Aldý syndy sańlaqtar boldy. Joǵaryda atap ótken jeti kezdesýdiń altaýyn Konordyń merziminen buryn aıaqtaǵanyn da aıta ketkenimiz abzal.

Keltter elinen kelgen jigittiń óneri birden jan­kúıerlerdiń kóńilinen shyqty. Ol ózine ǵana tán stılimen kózge tústi. Júris-turysy bólek, óz-ózin ustaý máneri ózgeshe, sózge sheshen sportshy ár jekpe-jekti shoýǵa aınaldyra bildi. Onyń qatysýymen ótken baspasóz más­lıhaty nemese kóz túıistirý rásimi ár kez daý-damaımen aıaq­talatyn. Janjal shyǵyp, arty tóbeleske ulasqan kezder de az emes. Al jekpe-jek dese dele­besi qozyp, qany qyz-qyz qaı­naıtyn kórermenderge de keregi sol. Bir sózben aıtsaq, ol aralas jekpe-jek ónerin jańa deńgeıge kóterdi.

Bir qyzyǵy, byltyr 33 jas­taǵy Makgregor nebári eki kezdesý ótkizip, eki retinde de óziniń syralǵy qarsylasy – amerıkalyq Dastın Poreden tehnıkalyq nokaýtpen utyldy. Oktagonda bar-joǵy 752 sekýnd aıqasty. Sonyń ózi baılyqqa belsheden batý úshin jetkilikti boldy. Irlandııa ókiliniń taza sporttaǵy tabysy 22 mıllıon dollaryn qurasa, jarnamadan túsken kiris – 158 mıllıon dollar. Barlyǵy – 180 mıllıon dollar. Úlken ómirin santehnık bolyp bastaǵan qarapaıym jumysshy qazirgi kezde úlde men búldege oranyp otyr. Ne ishemin, ne jeımin demeıdi. Kerisinshe, aqshasyn qaıda jumsaryn bilmeı, túrli brendter oılap tabýda. Konor osynyń barlyǵyna óziniń eńbegi men tabandylyǵy, eptiligi men iskerliginiń arqasynda qol jet­kizdi. Mine, osydan keıin «Ár­kimniń óz taǵdyry óz qo­lynda» degenge senbeı kórińiz!

Baı-qýatty sportshylardyń tiziminde ekinshi jáne úshinshi oryndardy álemdik fýtboldyń shoqjuldyzdary – Lıonel Mes­sı men Krıshtıaný Ronaldý ózara bólisýde. Argentınanyń maq­tanyshy 130 mıllıon (eńbek­aqy men syıaqy – 97 mln dol­lar+jarnama – 33 mln dollar) ta­bys tapsa, portýgalııalyq surmer­genniń kirisi – 120 mln dollar (70 mln dollar+50 mln dollar). Son­daı-aq «TOP-10» sportshynyń qata­rynda amerıkalyq fýtbol ókilderi Dak Preskott (107,5 mln dollar) pen Tom Bredı (76 mln dollar), basketbolshylar Djeıms Lebron (96,5 mln dollar) men Kevın Dıýrant (75 mln dollar), fýtbolshy Neımar (95 mln dollar), tennısshi Rodjer Federer (90 mln dollar) jáne «Formýla-1» sportynyń serkesi Lıýıs Hemılton (82 mln dollar) syndy sportshylar bar.

Forbes ótken jyly eń kóp tabys tapqan áıelderdiń de esimderin jarııa etti. Bul tizimge mynalar endi: Naomı Osaka (tennıs) – 57,3 mln dollar, Serena Ýılıams (tennıs) – 45,9 mln dollar, Vınýs Ýılıams (tennıs) – 11,3 mln dol­lar, Sımona Baılz (sporttyq gım­nastıka) – 10,1 mln dollar, Gar­bıne Mýgýrýsa (tennıs) – 8,8 mln dollar, Ko Djın Iаng (golf) – 7,5 mln dollar, Pýsarla Venkata Sındhý (badmınton) – 7,2 mln dollar, Eshlı Bartı (tennıs) – 6,9 mln dollar, Nellı Korda (golf) – 6,2 mln dollar jáne Kendıs Parker (basketbol) – 5,7 mln dollar.

Sońǵy jańalyqtar

Uqsas jańalyqtar