Qazaqstan • 18 Qańtar, 2022

Qazposhta tarıfter qunyn tómendetti

39 ret kórsetildi

«Qazposhta» AQ halyq arasyndaǵy eń kóp suranysqa ıe qyzmetterdiń tarıfterin – salmaǵy 2 kg-ǵa deıingi salymdary bar poshta jóneltilimderin (sálemdeme) jeke tulǵalarǵa jetkizý qyzmetiniń tarıfin ózindik quny deńgeıine deıin tómendetti, dep habarlaıdy Egemen.kz    «Qazposhta» AQ baspasóz qyzmetine silteme jasap.

 

Qazposhta basshylyǵy QR Prezıdenti Qasym-Jomart Toqaevtyń tapsyrmasyna sáıkes, aǵymdaǵy jylǵa bekitilgen tarıfterdi tómendetý týraly sheshim qabyldady. Budan bylaı salmaǵy 0,5 kg-ǵa deıingi sálemdemeni Qazaqstan boıynsha jer ústi kóligimen jiberý quny – 900 teńgeniń ornyna 857 teńge, salmaǵy 1 kg-ǵa deıin – 1000 teńgeniń ornyna 900 teńge, 2 kg-ǵa deıin – 1200 teńgeniń ornyna 1130 teńge boldy. Tómendetilgen tarıfter 2022 jylǵy 1-jartyjyldyq ishinde qoldanylady.

Qazposhta 2021 jyldyń sońynda 2022 jylǵa arnalǵan tarıfterdi arttyrý jaǵyna qaıta qarastyrǵanyn atap ótemiz. Atalǵan sheshimge tómende keltirilgen obektıvti faktorlar áser etken bolatyn.

Birinshiden, búgingi kúni Ulttyq poshta operatory 3000-nan astam zalaldy aýyldyq poshta bólimshelerin ustaý, gazetterdi jetkizý, zeınetaqylardy berý, pandemııa jáne kovıdqa qarsy sharalardyń saldarynan shekaralardyń jabylýy jáne halyqaralyq áýe qatynastaryndaǵy júıeli kidirister (2020-2021 jj. nátıjeleri boıynsha basqa eldermen aınalym kólemi pandemııaǵa deıingi kezeńge qaraǵanda 30-40% paıyzǵa túsken) sebepti týyndaǵan teris qarjy nátıjelerin kórsetip otyr. Alaıda Qazposhta zeınetaqylardy, járdemaqylardy, merzimdi baspa basylymdaryn jetkizý sııaqty áleýmettik barlyq júktemeni oryndaýdy jalǵastyrýda.

Ekinshiden, teris qarjy nátıjeleri Qazposhtanyń 17,8 myń adamnan turatyn óndiristik personalynyń jalaqysyn kóterýge kedergi keltiredi. Búgingi kúni jalaqylardy ındeksteý máselesi ózekti bolyp tur. Kompanııa qyzmetteriniń tarıfterin ózgertý – óndiris qyzmetkerleriniń eńbek jaǵdaılaryn jaqsartýǵa baǵyttalǵan sharalardyń biri.

«Qazposhta» AQ-nyń basymdylyǵy – tragedııalyq oqıǵalardan keıin kúrdeli qalpyna keltirý kezeńinde qazaqstandyqtarǵa jáne kompanııa qyzmetkerlerine qoldaý kórsetý. Onyń ishinde suranysqa ıe poshta qyzmetterin eldegi eń tómen baǵamen halyqqa usyný. 

Aıta ketý kerek, baılanystyń ámbebap kórsetiletin qyzmetterine tarıfter 2019 jylǵy deńgeıde qaldy (jaı hattardy jóneltý, MBB, poshta kartochkalary men sálemdemelerdi jetkizý). Sonymen qatar, jeke tulǵalar arasynda suranysqa ıe jáne bir ýaqytta básekelestik ortada júrgen tapsyrysty hattardy el ishinde jóneltý jáne jetkizý tarıfteri de ózgerissiz qaldy.

 

Sońǵy jańalyqtar

Uqsas jańalyqtar