Palata depýtattary aýyl máselesin turaqty túrde kóterip júrgenimen, olardy sheshý úshin Úkimet tarapynan tıisti sharalar qolǵa alynbaı keledi. Al aýyl turǵyndary qazir áleýmettik eń nashar jaǵdaıda qalyp otyr. Onyń ústine, olardyń kópshiligi statıstıkanyń salystyrmaly túrde jaqsy kórsetkishterine qaramastan «shyn máninde tirshilik etýge» májbúr. «Statıstıka derekteri boıynsha aýyldaǵy jumyssyzdar sany 181 myń adam nemese 4,7 paıyz. Biraq is júzinde jumyssyzdyq halyqtyń baǵyn ashpas sory boldy. Biz elimizdiń barlyq aýdanynda aýyl turǵyndary arasynda arnaıy áleýmettik saýaldama júrgizdik. Olardyń basym kópshiligi jumystyń joqtyǵyn «basty másele» dep atady. Osy saýaldamada kórsetkendeı, aýyl turǵyndarynyń naqty tabysy aıyna 35 myń teńgeni quraıdy. Mundaı aqshaǵa qalaı kún kórýge bolady?», dep surady Aqylbek Kúrishbaev.
Senator jumyssyzdyq saldary taǵy bir problemany týǵyzyp otyrǵanyn aıtyp, búginde aýyl halqynyń qalalarǵa ketý dınamıkasynyń artyp otyrǵanyn aıtady. «Biz júrgizgen áleýmettik saýaldama nátıjeleri kórsetkendeı, eńbekke qabiletti halyqtyń 41 paıyzy aýyldardan qalaǵa kóshýdi qalaıdy. Árıne, ýrbandalýdyń álemdik úrdis ekeni túsinikti, biraq ony basqarý kerek qoı. Jaqyn mańdaǵy aýyldardan bir sátte halyqtyń jappaı kóshi-qony bastalsa, qalalarymyzda ne bolmaq? Eger aýyl sharýashylyǵynda jumys isteıtin eshkim qalmasa, eldiń azyq-túlik qaýipsizdigin qalaı qamtamasyz etemiz? Shekaralas aýdandar qalaı qorǵalmaq?», dedi senator.
Depýtat bul másele elimiz úshin tek ekonomıkalyq qana emes, sonymen qatar saıası jáne strategııalyq mańyzǵa ıe ekenin atap ótti. Sondyqtan A.Kúrishbaev Úkimettiń aýyldardy damytýǵa nege tıisti kóńil bólmegenine jáne senatorlardyń parlamenttik tyńdaýda bergen usynystarynyń negizgi tarmaqtaryn áli de oryndamaǵanyna nazar aýdardy. Depýtat aýyldy damytýǵa iri aýyl sharýashylyǵy kompanııalary belsendi úles qosýǵa tıis ekenin aıtty.
