Aımaqtar • 24 Qańtar, 2022

Sapa artpaıynsha, sýbsıdııa joq

51 ret kórsetildi

Qaraǵandy oblysynda jolaýshylar tasy­ma­lynyń sapasyn jaqsartý máselesine aıryqsha nazar aýdaryla bastady. Bul sharýa áýeli Qara­ǵandy men Temirtaý avtoparkterinen bas­talmaq.

Jasyratyny joq, atalǵan salada sheshilmegen máseleler kóp jáne olar biraz ýaqyttan beri kún tártibinde ótkir tur. Máselen, monopolıster qıt etse sýbsıdııa mólsherin arttyrý jónindegi áńgimeni jón-josyqsyz qozǵaı beretin. Endi olar qyzmet kórsetý servısiniń deńgeıin joǵarylatpaıynsha, bul týraly aýyz asha almaıdy. Bul týrasynda oblys ákimdiginde ótken onlaın-keńeste óńir basshysy Jeńis Qasymbek aıtty.

– Jolaýshylar tasymaly sapasyna qatysty shaǵymdar óte kóp. Turǵyndar áleýmettik jelilerde jazady. Maǵan tártip ornatý týraly ótinishter keledi. Avtobýstardyń jetispeýine, kesteniń saq­tal­maýyna, júrgizýshiler men kondýktorlardyń dórekiligine, sanıtarlyq talaptardyń buzylýyna shaǵymdanady, – dep kemshilikterdi jipke tizdi oblys ákimi.

Qaraǵandydaǵy eń iri tasymaldaýshynyń biri – №3 avtopark dırektory Artýr Grıgorıan kásip­oryn­nyń birqatar problemasyn tilge tıek etip aqtalǵanymen, aıtylǵan synmen kelispeske amaly qalmady.

 – Qyzmet kórsetý mádenıetine keletin bolsaq, biz muny bilemiz. Kún saıyn, aı saıyn bizdiń kásiporyn boıynsha elýge jýyq shaǵym túsedi. Biraq bul jerde eshkimdi aqtaǵym kelmeıdi. Shaǵymdardyń sanyn azaıtý kerek, – dedi ol.

Atalǵan avtopark dırektorynyń aıtýynsha, avtoparkkke eńbekaqysy az bolǵandyqtan júrgizýshiler kelmeıdi. Budan ózge pandemııa kezinde jolaýshylar sany azaıyp ketken. Sáıkesinshe, amortızasııalyq shyǵyndar óse tústi.

Onlaın-keńeste júrgizýshilerdiń jetispeýshiligi jáne sýbsıdııalar mólsherin arttyrý qajettiligi týra­ly Qaraǵandy men Temirtaýdyń basqa tasymaldaýshylary da aıtty. Buǵan oblys ákiminiń bergen jaýaby naqty ári qatań boldy.

– Biz sýbsıdııalardy kóbeıtemiz. Biraq sizder sapaly qyzmet kórsetińizder jáne avtobýstardy jańartý boıynsha mindettemeler alyńyzdar! – dedi ol.

Eske salar bolsaq, byltyr Saran qalasynda shyǵarylatyn otandyq óndiristiń 40 jańa avtobýsy paıdalanýǵa berilgen. Oblystyq jolaýshylar kóligi jáne avtomobıl joldary basqarmasynyń málimetinshe, Temirtaýda – 20, Jezqazǵanda – 20 jáne Saranda dál osyndaı 11 avtobýs jolaýshylardy tasyp júr.

Búginde Qaraǵandy qalasynda elektrondy tólem júıesin engizilgenin aıta ketken lázim. Qazirgi ýaqytta 160 myńǵa jýyq ONAY! kartasy satylypty. Qala ákimi Ermaǵambet Bólekpaevtyń aıtýynsha, qolma-qol aqshasyz tólem búginde aınalymnyń tórtten bir bóligin qurap otyr.

 

Qaraǵandy oblysy

Sońǵy jańalyqtar

Dollar 10 teńgege qymbattady

Qarjy • Búgin, 16:23

Referendýmǵa latvııalyq baqylaýshylar keledi

Referendým-2022 • Búgin, 15:25

Saıajaıdan esirtki zerthanasy tabyldy

Aımaqtar • Búgin, 13:07

Uqsas jańalyqtar