Bes jylda mektepterde oryn tapshylyǵy bolmaıdy

Búgingi tańda qala mektep­te­rin­­degi oryn tapshylyǵy 33 812 bolsa, balabaqshalarda 40 myń­dy quraıdy. Onyń sebepterin qurylys qarqynynyń tómendigi men bala sanynyń kóbeıýimen baılanystyrǵan qala ákimi bul máseleni sheshý úshin jańa mektepter men balabaqshalardyń jedel qurylysyna basa nazar aýdara otyryp, áleýmettik nysandardy ashý josparlary túzetilgenin jet­kiz­di. Nátıjesinde, bıyl 48, ıaǵnı onyń ishinde bıýdjet esebinen – 16, MJÁ arqyly – 4, qurylys kom­pa­nııalarymen memorandýmdar boıynsha – 16, jeke ınvestısııa­lar esebinen 10 mektep mektep ashý josparlanǵan. Sonymen birge Áýezov jáne Bostandyq aýdan­da­ryndaǵy eki mekteptiń buryn jeke­shelendirilgen ǵıma­rat­tary satyp alynady.

Qala ákimdiginiń dereginen má­lim bolǵandaı, bıyl 82 bala­baq­sha (jalpy alǵanda 10 myńnan astam oryn) ashý josparlanǵan, onyń ishinde 11 balabaqsha kommýnaldyq menshikke qaıtarý sebebinen paıdalanýǵa berilmegen. Jetisý aýdanynda burynǵy balabaqsha ǵımaratyn jáne 10 shaǵyn aýdan­­­­­­da balabaqshany satyp alý jos­par­lanǵan. Bıýdjet esebinen 9 balabaqsha, jeke ınvestısııalar esebinen 60 balabaqsha salynady. Aldaǵy 5 jylǵa deıin mektepter men balabaqshalardaǵy oryn tapshylyǵyn boldyrmaýdy mindet etip otyrǵan qala basshylyǵy mektepten tys tegin bilim berýmen qamtýdy arttyrý úshin (qazir bul kórsetkish nebary 9 paıyzdy qu­raı­dy) naýryz aıynda Dostyq dańǵyly boıyndaǵy Oqýshylar saraıyn jańǵyrtýdy aıaqtaý, Alataý jáne Naýryzbaı aýdandarynda 2 jańa Oqýshylar saraıynyń, sondaı-aq Bostandyq, Almaly jáne Túrksib aýdandarynda eski ǵımarattardy buzyp, 3 oqýshylar úıiniń qurylysyn damytý jos­parlanyp otyr. Sonymen qatar qa­lada tarıhı ortalyqty saqtaı oty­ryp, qurylys salý erejeleri qabyl­danǵan. Osy oraıda turǵyn úı keshenderi mańynda mek­tepter, bala­baqshalar, ózge ınfra­qu­ry­lymmen qolje­tim­dilikti qamta­masyz etý mindettemeleri engi­zilgen. Sonymen qatar almaty­lyq­­tardyń «Halyqtyq bıýdjetke qatysý» jobasyna belsendi qa­ty­sýy nátıjesinde usynystar úsh esege deıin ósken. Bıyl jobany júzege asyrýǵa 7,4 mlrd teńge qa­ras­­ty­ry­lyp otyr. Al qar­jy­­landyrý kólemi turǵyndar sura­ny­synyń artýyna baılanysty bolady.

ALMATY