О́ner • 25 Qańtar, 2022

Qos platına kúıtabaǵy Colorit-Arystanǵa buıyrdy

1956 ret

kórsetildi

1 mın

oqý úshin

Kenshiler astanasyndaǵy Táttimbet atyndaǵy óner kolledjiniń sońǵy kýrsynda oqıtyn Arystan Ábildın óner jolyndaǵy eń úlken tabysyna qol jetkizdi. Daryndy jas asa tanymal Slava Marlow & Morgenshtern esimdi ánshilerdiń «Bystro» degen týyndysyn oryndap, kaverdi 45 mıllıon adam tyńdaǵan.

Qaırat Ábilda

Qos platına kúıtabaǵy Colorit-Arystanǵa buıyrdy

Osy jáne ótken jyldyń qorytyndysy boıynsha basqa da shyǵarmashylyq tabystary úshin ol eki birdeı platına dıskisine ıe boldy.

Arystannyń ózi bul týrasynda Instagram paraqshasynda bylaı dep jazdy: «Bystro» áni 45 mıllıon tyńdaýdy jınap, qos platına dıskisin aldy. Kezinde men ánshilerdiń osyndaı marapattar alyp jatqanyn kórip, mundaıdy tek qana armandaýshy edim. Kúnderdiń bir kúninde óz jumysym úshin platına alatynymdy kóz aldyma elestete de almaǵanym ras. Meni qoldaǵandaryńyz úshin barshańyzǵa alǵys aıtamyn».

Arystan Ábildın mýzykalyq otbasynda dúnıege kelgen. Onyń ákesi jergilikti «Shyńdaýyl» atty ansambldiń dırektory, mýzykanyń djaz túrimen aınalysady. Al anasy mýzykalyq kolledjdegi hordyń dırıjeri.

Colorit psevdonımimen óner kórsetip júrgen Arystan Ábildın byltyr halyqaralyq TikTok konkýrsynda top jarǵan bolatyn.

Jas darynnyń bolashaqtaǵy jospary da zor. Ázirge ol áleýmettik jelilerdegi tanymaldylyǵyn arttyrýmen aınalysyp júr. Qazirdiń ózinde onyń Instagram, TıkTok jáne VK tobynda júz myńdaǵan jazylýshysy bar. Bul degenińiz, jas ánshini tyńdaıtyn aýdıtorııanyń aıasy kúnnen-kúnge ulǵaıyp keledi degen sóz.

QARAǴANDY