Karantındi jeńildetý jaýapkershilikti azaıtpaıdy

Densaýlyq saqtaý mınıstrliginiń Sanıtarlyq-epıdemıologııalyq baqy­laý komıtetiniń tóraǵasy Aıjan Esma­ǵam­betovanyń aıtýynsha, jyl basynan beri respýblıkada 178 myńnan astam adam koronavırýs ınfeksııasy­men aýyrǵan.  Pandemııanyń búkil kezeńimen salystyrǵanda alǵash ret syr­qattanǵandardyń táýliktik tirkelýi 16 myńnan asty. Bul «Omıkron» shtamy­nyń óte joǵary juqpalyǵyna jáne taralý jyldamdyǵyna baılanys­ty. Soǵan qaramastan karantın talaptary jeńildetilip otyr.

– Bilim berý uıymdarynda balalardy oqytý formaty qaıta qaraldy. Oqytýdyń onlaın formaty bilim sapasyna jáne oqýshylardyń, ásirese bas­taýysh synyptardyń áleýmettenýine áser etedi. 1 jáne 2-toqsanda mektep­terde oqýshylardyń qaýipsizdigin qam­tamasyz etý boıynsha jumys tájirı­besi qalyptasty. Osyǵan baılanys­ty 24 qańtardan bastap syıymdylyǵy 600 oqýshyǵa deıingi kólemdi quraıtyn mek­tep­ter shtattyq formatqa aýysty. Al oqýshy sany 600-den asatyn mek­tep­­terde oqytýdy uıymdastyrýǵa sara­lanǵan tásil qoldanylady. Iаǵnı oqýshylardyń 50 paıyzy ǵana shtattyq for­mat­ta oqytylady. Oqytý formatyn tańdaý kezinde mindetti túrde vaksınamen qamtý deńgeıi eskeriledi. Joǵary oqý oryndary men kolledjderde de saralanǵan tásil engizildi: dárister – onlaın, qalǵan sabaqtar qolaıly keste boıynsha shtattyq rejimde ótedi, – dedi A.Esmaǵambetova. 

Sonymen qatar sanepıdbaqylaý organdary turaqty negizde indetke qarsy sharalardyń saqtalýyna monıtorıng júrgizedi. Eger synypta KVI juqtyrý jaǵdaıy anyqtalsa, búkil synyp onlaın formatqa aýystyrylady.

Infeksııanyń taralý jyldamdy­ǵy men juqpalylyǵyn eskere otyryp, karantın merzimi, sáıkesinshe, Ashyq qosym­shasyndaǵy mártebeniń ózge­rý merzimi qaıta qaraldy. A.Esma­ǵam­betovanyń aıtýynsha, jaqyn baılanys­ta bolǵan jáne sımptomsyz naýqastar úshin karantın merzimi 14 kúnnen 10 kúnge deıin qysqartyldy. Bul rette PTR-testi teris nátıjeni kór­set­se, 7-shi táýlikte karantın aıaq­tala­dy. PTR-testinen ótpegen jaǵ­daı­da, ka­ran­­tın PTR-testi qaıta tap­syrýsyz-aq 10-shy kúni aıaqtalady.

– Memleket basshysynyń tapsyrmasyna sáıkes Úkimet bıznes sýbektilerine qoıylatyn shekteýler­di tómendetý tásilderin ázirledi. Bız­nes nysandarynda Ashyq joba­syn odan ári engizý jalǵasyn tabady. «Jasyl» jáne «kók» mártebesi bar kelýshilerge ruqsat etilgen nysandar úshin barlyq aımaqta jumys isteý ýaqy­ty­na qatysty shekteýler alynyp tastalady. Epıdemııa­lyq táýe­keli joǵary bolsa da, Ashyq-ta «jasyl» mártebesi bar adamdar toı, eske alý sharalaryn, sporttyq is-shara­lar­dy, kórmeler men forýmdardy ótkize alady. Epıdemııalyq táýe­kel aımaǵyna qaramastan «kók» már­tebesi bar adamdar qonaqúılerge, áýe­jaılarǵa, temir jol vokzaldaryna, avtovokzaldarǵa, Halyqqa qyzmet kór­­setý ortalyqtaryna, «Qazposhta» bólim­shelerine, bankterge, qoǵamdyq tamaq­taný oryndaryna, jabyq bazar­larǵa, bilim berý ortalyqtaryna, SPA-ortalyqtarǵa, sulýlyq salondaryna, oblysaralyq, oblysishilik, qalalyq tasymaldarǵa shekteýsiz kire alady, – dedi komıtet tóraǵasy.

Al «kók» mártebesi bar kelýshiler úshin «jasyl aımaqtaǵy» shekteýler alynyp tastalady. Qoǵamdyq tamaq­taný oryndarynyń, mádenıet nysan­darynyń, eresekter men bala­lar­ǵa arnalǵan oıyn-saýyq oryn­darynyń tolymdylyǵy «sary aımaqta» – 70 pa­ıyzǵa deıin, «qyzyl aımaqta» 60 pa­ıyzǵa deıin ulǵaıtyldy.

– Bıznestiń barlyq salasynda karan­tındik sharalar jeńildetiledi. Bul – olarǵa berilgen múmkindik. Tıisinshe, buǵan úlken jaýapkershilikpen qaraý kerek, – dedi A.Esmaǵambetova. 

Densaýlyq saqtaý júıesindegi júkteme artyp, koronavırýstyń saldarynan bolatyn ólim-jitimniń kóbeıýi anyqtalǵan kezde qosymsha shekteý sharalary engizilýi múmkin.