Jańa mamandyqtardyń óńirlik atlasy ázirlenedi

Turǵyndar jaǵdaıynyń jaqsarýy qala ekonomıkasynyń damýymen tyǵyz baılanysty. Osy oraıda megapolıs basshysy «Biz saýdanyń, onyń ishinde onlaın-satýdyń jańa formattaryn engizý arqyly naryqtyq saýdaǵa negizdelgen ekonomıkanyń qalyptasqan formatynan aýytqıtyn bolamyz», dep atap ótti. Osy baǵytta qala ákimdigi sıfrlandyrý, kreatıvti ındýstrııa, ónerkásip jáne basqa da joǵary ónimdi salalardy damytý esebinen ekonomıkanyń qurylymdyq reformalaryn júzege asyrýda.

Al qalalyqtardy jumyspen qamtý – ómir súrý sapasyn arttyrýdyń mańyzdy qadamy ári iskerlik belsendilikti yntalan­dy­rýdyń negizi. Ákimniń aıtýynsha, búginde suranysqa ıe kadrlardyń jetispeýshiligi eńbek naryǵynyń naqty qajettiligine sáı­kessizdikti kórsetip otyr. «Osyǵan baı­­lanysty bilim, qoǵamdyq damý, áleý­met­tik ál-aýqat basqarmalaryna kadrlardy daıarlaý kezinde kolledjderdiń baǵ­dar­la­malaryn qaıta qaraýdy tapsyramyn», dedi B.Saǵyntaev. Sonymen birge jastardy kásiptik tehnıkalyq daıarlaýdy jáne jumyssyzdardy qaıta oqytýdy kúsheıtip, keıinnen jumysqa ornalastyrý kózdelip otyr. Jeke sektordan júıelik operatorlardy tartý arqyly bilikti jumys oryndary qurylady. Sońǵy 2 jyl ishinde «Kásip alańy», «Almaty Bıznes» baǵdarlamalary boıynsha kásipkerlik negizderine oqytý, 200 myńǵa jýyq adamdy qamtıtyn Qolday kásipkerlik ortalyǵynyń kýrstary júr­gizildi.

Qala basshysy bolashaqta ekonomıkanyń túrli salasyndaǵy qajettilikterdi boljaý úshin jańa mamandyqtardyń óńirlik atlasy ázirlenetinin atap ótti. «О́tken jyldan bastap biz aýdandardyń myqty jaqtaryn baǵdarlaı otyryp, klasterlik tásildi qoldana bastadyq jáne jetekshi ýnıversıtetterdi – Súleımen Demırel, Almaty menedjment ýnıversıteti, QBTÝ, HATÝ sııaqty oqý oryndaryn aýdandardyń strategııalyq damýyna jumyldyrdyq», dedi B.Saǵyntaev.

Osynyń barlyǵy ınnovasııalyq jobalardy damytý úshin jańa jaǵdaılar jasaýǵa jáne jańa kásibı quzyretter men jańa jumys oryndaryna qajettilikti qa­lyptastyra otyryp, árbir aýdandy kú­sheı­týge múmkindik beredi. Bıyldan bastap jas­tar praktıkasy boıynsha jalaqy 25-ten 30 AEK-ke deıin ulǵaıtyldy. «Biz óz tarapymyzdan jergilikti bıýdjetten qosymsha 10 AEK-ke tólemdi ulǵaıtamyz, osy­laısha jalaqy 122,5 myń teńgeni quraıtyn bolady. Al jumys isteıtin mú­ge­dekter úshin áleýmettik jumys oryndaryn sýbsıdııalaý mólsheri 63 myńnan 92 myń teńgege deıin ulǵaıtylady. Jalpy, barlyq sharanyń arqasynda keminde 50 myń jumys orny ashylady» dedi qala ákimi.

ALMATY