«Qazir biz osyndaı úkimetaralyq kelisimder aıasynda oqýǵa úmitkerlerdi irikteý erejelerin jetildirý boıynsha jumys istep jatyrmyz. Halyqtyń áleýmettik osal toptary úshin, mysaly, kóp balaly otbasylardan shyqqan balalar, jetim balalar, erekshe bilim berý qajettilikteri bar balalar, sondaı-aq aýyldyq jerlerden kelgen úmitkerler úshin artyqshylyqtar qarastyrylady», dedi Halyqaralyq baǵdarlamalar ortalyǵynyń basqarma tóraǵasy Ánýar Janǵozın.
«Stipendium Hungaricum» stıpendııalyq baǵdarlamasy qazaqstandyqtarǵa kelesi baǵdarlamalar boıynsha 250 grant beredi:
- Bakalavrıat baǵdarlamasy boıynsha - 110 oryn;
- Magıstratýra baǵdarlamasy boıynsha - 90 oryn;
- Bakalavrıat+magıstratýra baǵdarlamasy boıynsha - 30 oryn;
- Doktorantýra baǵdarlamasy boıynsha - 20 oryn.
Granttar Vengr tiliniń tildik kýrstaryna, akademııalyq oqýǵa, jataqhanada turýǵa, medısınalyq saqtandyrýǵa jumsalatyn shyǵyndardy óteıdi, sondaı-aq stýdentterge aı saıynǵy stıpendııa tólenedi.
Oqytý aǵylshyn jáne vengr tilderinde júrgiziledi. Úmitkerler vengr tilinde oqýdy tańdaǵan kezde vengr tili bir jyl boıy oqytylady.
